Kur startup-et flasin, ia vlen të dëgjosh. Pesë themelues që ndërtuan kompani milionere nga zero ndajnë mësimet që u japin më shumë rezultat themeluesve në fillim të rrugëtimit. Ja çfarë duhet të marrësh me vete në udhën tënde si sipërmarrës.
Lexo gjithashtu: 5 mësime lidershipi nga Papa Françesku që çdo CEO duhet t’i lexojë
Evan Goldberg – Fokusohu te klientët që tashmë ke
Themelues i NetSuite, kompania e parë cloud në botë, Evan Goldberg kaloi një ndër recesionet më të vështira me një qasje që ende i qëndron kohës: “Në kohë të vështira, përqendrohu te ata që tashmë të besojnë.”
Në vend që të ndiqte klientë të rinj, ai vendosi të mbështeste klientët ekzistues që po përballeshin me sfida ekonomike. Dhe ajo që nisi si zgjidhje emergjente, u kthye në filozofi afatgjatë të kompanisë.
Holly Thaggard – Autenticiteti nuk blihet
Themeluese e markës revolucionare të kujdesit ndaj diellit, Supergoop!, Holly Thaggard ndërtoi një brand global me një mision të qartë, edukimin për mbrojtjen e lëkurës që nga fëmijëria.
“Duhet të jesh aq pasionant për diçka sa të mos të lërë të flesh natën,” thotë ajo. Dhe ky pasion është i vetmi garant për një markë që rritet pa kompromis dhe qëndron gjatë.
Michelle Zatlyn – Shko aty ku janë klientët
Në fillimet e Cloudflare, Michelle dhe bashkëthemeluesit dolën në treg me një produkt që ajo vetë e quante “të paplotë.” Por reagimi i përdoruesve ishte i fuqishëm dhe i menjëhershëm.
Ata jo vetëm që e përdorën produktin falas, por e kthyen në zgjidhje të pandashme për biznesin e tyre. E gjitha nisi me guximin për të dalë në treg, edhe para se të ndiheshin të “gatshëm.”
Lexo gjithashtu: Paguhesh pak? 10 truke që të ndihmojnë të negociosh si një CEO
Suneera Madhani – Mos injoro instinktin
Themeluese e Stax, një startup fintech që u bë “unicorn” me vlerë mbi $1 miliard, Suneera sfidoi bordet dhe investitorët me një forcë të rrallë, kombinimin e mendjes analitike, zemrës dhe instinktit.
Kur refuzoi një ofertë të dobët financimi, ajo e dëgjoi zërin e brendshëm. Rezultati? Një ofertë më e mirë erdhi pak javë më vonë dhe ndryshoi gjithçka. “Instinkti është arma më e fuqishme që ke, përdore!”
Nik Mirkovic & Alex Tomic – Karakteri mbi gjithçka
Të dy në të njëzetat kur nisën Hismile, Nik dhe Alex ndërtuan një brand dentar që sot pritet të kapë 1 miliard dollarë të ardhura. Sekreti i tyre? Nuk kërkonin vetëm ekspertë, por njerëz me karakter.
Ata preferuan të punësonin njerëz që ndanin vlerat e tyre, edhe kur ata vinin nga fushat më të papritura. Për ta, asgjë nuk mund të zëvendësojë vullnetin për të mësuar dhe dëshirën për të bërë gjëra të mëdha.
Në fund të ditës…
Të gjitha këto histori kanë një fijë të përbashkët, nuk ka formula magjike, por ka të vërteta që vlejnë gjithmonë. Një pasion i palëkundur, vëmendja ndaj klientit, guximi për të dalë në treg, dhe intuita, janë armët më të forta për çdo sipërmarrës që synon suksesin real.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
