4 vlerat që duhet të ketë çdo kompani për të qenë e suksesshme

3. “Çdo mendim që kam për punën tënde apo ty si person, do ta them përballë” – Kjo është një nga pjesët më të vështira. Kultura e kompanisë ndaj thashethemit është një nga sfidat më të mëdha që ajo duhet të përballojë, veçanërisht lidershipi. Në Maxbrand, ne kemi një sesion të gjatë “one-to-one” një herë në katër muaj. Ajo që i them çdo punonjësi është pikërisht kjo: “Çdo gjë që kemi për të diskutuar, duhet ta flasim këtu. Çdo gjë tjetër që flitet jashtë kësaj dhome quhet thashethem.” A është kompania jonë imune ndaj thashethemit? Absolutisht jo! Ka – dhe ka me shumicë. Por mund ta them me përgjegjësi të plotë se lidershipi i kompanisë ka një politikë “tolerancë zero ndaj thashethemit”. Nuk ndjekim askënd për të parë nëse përhap thashetheme – kjo është joefektive – por ajo që është në dorën tonë është të tregojmë që ne si drejtues nuk bëjmë thashetheme. Dhe nuk bëjmë, vërtet! Çdo mendim që kam për një punonjës, ia them hapur. Të gjithë e dinë çfarë mendoj për ta. Dinë çfarë bëjnë mirë dhe çfarë duhet të përmirësojnë. Dhe dinë diçka shumë të rëndësishme: që ajo bisedë mbetet brenda dhomës. Nëse del diku tjetër, ai/ajo do të dijë saktë se kush ka qenë në dijeni.

Le të jap një shembull praktik të një bisede të tillë (zakonisht zgjat më shumë se një orë):
“I dashur punonjës, mënyra si e kryen këtë detyrë është fantastike, më pëlqen shumë (duke përmendur konkretisht procesin dhe pse mendoj se po bën një punë të mirë). Ajo që duhet të përmirësosh është shpejtësia me të cilën kryen detyrën tjetër. Në këtë aspekt je i ngathët dhe joefektiv. Nga 1 në 10, vlerësimi im është 3. Kjo është diskutuar me menaxherin tënd dhe përveç nesh, askush tjetër nuk është në dijeni dhe nuk do të jetë kurrë. Ne jemi këtu që ti të përparosh, zhvillimi yt është zhvillimi i kompanisë. Ne do të bëjmë gjithçka që është në dorën tonë që ti të kesh sukses. Premtimi im është që asnjë nga këto fjalë nuk do të dalë jashtë kësaj dhome. Dhe nëse ndodh, unë jam i vetmi përgjegjës. Do të takohemi sërish në mbledhjen e radhës dhe do të shohim progresin tënd. A isha i qartë?”

4. A bëjnë eprorët komplimenta “mbrapa krahëve”? Kjo është e kundërta e thashethemit. Nëse fjala “thashethem” ka konotacion negativ, duhet të ekzistojë një term për këtë fenomen pozitiv. Të krijosh një kulturë ku kritika jepet privatisht, ndërsa lavdërimi publikisht, është diçka shumë e mirë. Por po t’i shtojmë lavdërimit publik edhe lavdërimin mbrapa krahëve? Së pari, kjo krijon një atmosferë pozitive për personin që dëgjon dhe në mënyrë të pavetëdijshme mendon: “Me shumë gjasa kështu flitet edhe për mua.” Së dyti, këto fjalë më herët a më vonë do të mbërrijnë në veshët e personit për të cilin janë thënë dhe do të kenë efekt të jashtëzakonshëm.

Këto ishin vetëm disa elementë që, sipas meje, e bëjnë një kompani “të jetueshme”. Nuk janë të vetmet, dhe sigurisht nuk garantojnë që kultura e përgjithshme do të jetë në nivel të lartë vetëm sepse shefi ju thotë “faleminderit” dhe “të lutem”. Megjithatë, provo të mos i bësh këto. Provo të bësh të kundërtën: të dëgjosh thashetheme, të japësh urdhra ftohtë, të flasësh keq pas krahëve për punonjësit dhe të mos pranosh kurrë fajin për asgjë. Do ta shohësh rezultatin e kësaj kulture herët a vonë. Vlerat e kompanisë nuk janë ato që varen në mur, por ato që mishërohen në punën e përditshme dhe ndërtohen ngadalë, me këmbëngulje.