Michael Fiddelke, CEO i ardhshëm i Target, është një shembull i gjallë se praktikat nuk janë vetëm për të sjellë kafe menaxherëve apo për të bërë punët e rëndomta, ato mund të kthehen në trampolinë karriere. Çfarë nisi si një vendim veror në departamentin e financës dy dekada më parë, më 1 shkurt do ta çojë atë në krye të kompanisë 44 miliardë dollarëshe, duke pasuar Brian Cornell.
Nga praktikë në krye të kompanisë
Edhe pse sot 49-vjeçari merr drejtimin e Target, rruga e tij nisi shumë më herët, në një fermë të vogël në Iowa ku familja e tij kultivonte misër, sojë dhe rritej bagëti. Familja më pas ndërtoi edhe biznese të vogla, përfshirë një dyqan pijesh alkoolike dhe hotele Super 8.
Fiddelke studioi inxhinieri në Universitetin e Iowa-s, punoi si konsulent në Deloitte dhe më pas përfundoi MBA në Northwestern. Pikërisht gjatë kësaj kohe, gjatë shkollës së biznesit, ai bëri praktikën verore në Target, praktikë që ia ndryshoi jetën. Që nga viti 2003 ka punuar në fusha të ndryshme brenda gjigantit të shitjes me pakicë: merchandising, financë, operacione dhe HR. Së fundmi ka shërbyer si CFO dhe më pas si COO, role që i dhanë mundësinë të ishte pjesë e vendimeve më të mëdha të kompanisë. “Kur nisa praktikën time në Target, nuk e kisha menduar kurrë se ku do të më çonte kjo rrugë,” tha Fiddelke në një postim në LinkedIn. “Aty ku nis, rrallë është aty ku do të përfundosh.”
Lexo edhe:E urreni punën tuaj? Ja se si ta bëni më argëtuese
Mesazhi për Gen Z: bëhuni kureshtarë, pranoni feedback-un dhe ndërtoni marrëdhënie
Në një reflektim për rrugëtimin e tij, ai ndau disa këshilla për gjeneratën e re që po nisin praktikat e tyre të para:
-
Bëhuni të kureshtarë. Mos kini frikë të bëni pyetje.
-
Pranoni feedback-un. Është mënyra më e shpejtë për të mësuar.
-
Shfrytëzoni momentin. Lidhuni me njerëz brenda kompanisë dhe kolegët praktikantë.
Ai theksoi se presioni për t’i pasur të gjitha të qarta që në moshën 18 vjeç është i panevojshëm. “Karriera, pasionet dhe synimet tuaja do të evoluojnë. Merrni vendimet më të mira me dijen që keni sot, dhe jepini vetes hapësirë të ndryshoni rrugë përgjatë kohës,” u shpreh ai për një grup adoleshentësh në qytetin e tij të lindjes. Gjithashtu, Fiddelke nënvizoi rëndësinë e mirësisë dhe kureshtjes. Sipas tij, ekipet e tij kanë performuar më mirë kur kanë punuar me këtë qasje. “Në një botë të shpejtë dhe të ndarë, mirësia është ushqyese,” tha ai.
Jo i vetmi që u ngjit nga poshtë-lart
Fiddelke nuk është i vetmi CEO që nisi nga nivelet më të ulëta.
-
Juvencio Maeztu do të bëhet CEO i Ikea këtë nëntor, pas 25 vitesh në kompani, duke filluar si menaxher dyqani në Spanjë.
-
Doug McMillon, drejtuesi i Walmart, nisi duke shkarkuar rimorkio për 6.50 dollarë në orë në moshën 17 vjeçare, dhe sot është CEO i kompanisë.
-
Pano Christou, CEO i Pret A Manger, nisi rrugëtimin aty pas një rekomandimi nga një koleg i McDonald’s, me pagë vetëm 2.75 paund në orë.
Këto histori tregojnë se, ndonëse starti mund të duket modest, qëndrueshmëria, fleksibiliteti dhe gatishmëria për të mësuar mund t’ju çojnë deri në majë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
