2023 pritet të cilësohet ndër vitet më të mira të turizmit shqiptar deri më tani. Një fushë që nisi mirë që në fillim të vitit, po sheh numra në rritje në muajt e verës, duke mundësuar rritje të flukseve turistike në hotelet dhe resortet shqiptare.
Sipërmarrësit dhe ekspertët e turizmit vlerësojnë se kjo erdhi si një bum pas pandemisë. Liria e lëvizjes që në verën e vitit 2020, kur shumë vende po aplikonin kushte të shtrënguara për lëvizje, ka bërë që vendi ynë të njihet edhe nga turistë të rinj.
Krahas kësaj, shërbimi turistik duket i përmirësuar, pavarësisht sfidës që hotelet dhe restorantet po hasin në gjetjen e punonjësve.
Të dhënat e fundit nga INSTAT, tregojnë se tashmë Kosova nuk është vendi kryesor nga ku vijnë turistë. Shqipëria duket se ka hyrë zyrtarisht në axhendën e operatorëve evropianë të turizmit, përfshirë Britaninë e Madhe. Në një artikull të shkruar së fundi nga The Sun, theksohet interesi i rritur dhe kurioziteti i britanikëve për të pushuar në vendin tonë.
Në mënyrë të drejtpërdrejtë ose jo, në njohjen e Shqipërisë nëpër botë, vlerësohet të kenë ndikuar edhe koncertet e yjeve ndërkombëtare me origjinë shqiptare në vitet e kaluara, si Rita Ora dhe Dua Lipa.
Por, duket se operatorët turistikë duhet të zgjerojnë më tej kapacitetet e tyre për vitet në vijim. Kryeqyteti shqiptar këtë vit u bë pritës i yjeve të tjerë ndërkombëtarë si Enrique Iglesias dhe Ricky Martin, të cilët gjithashtu e kanë bërë të njohur Shqipërinë tek ndjekësit e tyre.
Një tjetër faktor rritës është rikthimi i diasporës. Miq dhe familjarë e kanë kthyer në pikëtakimi Shqipërinë. Ata mbildhen nga kontinente dhe vende të ndryshme, për të pushuar, por edhe për t’u takuar së bashku.
Ndërsa do të duhen disa muaj për të parë në shifra numrin e turistëve këtë verë, operatorët turistikë, kanë parashikuar një rritje me 30% të numrit të turistëve, referuar kontratave të bëra në muajt e parë të këtij viti.
Në këtë mënyrë, rekordi i turizmit pritet të thyejë atë të vitit të kaluar, ku numërohen 7.5 milionë pushues.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
