Një studim i fundit sugjeron se konsumimi i moderuar i kafesë gjatë moshës së mesme mund të kontribuojë në një plakje më të shëndetshme tek gratë. Sipas gjetjeve, pirja e dy deri në katër filxhanëve në ditë lidhet me funksion më të mirë njohës, performancë fizike më të qëndrueshme dhe rrezik më të ulët për zhvillimin e disa sëmundjeve kronike.
Studiuesit theksojnë se përbërës si acidet klorogjenike, të pranishme në kafe, mund të ndihmojnë në uljen e inflamacionit dhe në rregullimin e nivelit të sheqerit në gjak. Megjithatë, ata sqarojnë se përfitimet janë më të dukshme kur kafeja shoqërohet me një stil jetese të balancuar, që përfshin ushqim të shëndetshëm dhe aktivitet fizik të rregullt.
Në të njëjtën kohë, ekspertët paralajmërojnë për rëndësinë e kohës së konsumimit. Një studim që analizoi zakonet e rreth 2,000 pjesëmarrësve arriti në përfundimin se filxhani i fundit i kafesë duhet të konsumohet rreth shtatë orë para gjumit për të mos ndikuar në cilësinë e tij.
Duke folur në emisionin This Morning të ITV, mjekja Dr. Nighat Arif shpjegoi se kafeina ka strukturë të ngjashme me adenozinën, një hormon që grumbullohet gjatë ditës dhe nxit ndjesinë e përgjumjes. Sipas saj, kafeina “zë vendin” e adenozinës në receptorët e trurit, duke bllokuar sinjalin e lodhjes dhe duke na mbajtur zgjuar.
Për këtë arsye, ajo rekomandon që konsumimi i kafesë të ndalet rreth orës 14:00, në mënyrë që organizmi të ketë kohë të mjaftueshme për të metabolizuar kafeinën dhe për të siguruar një gjumë cilësor.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
