1/3 e ekonomisë botërore në recesion gjatë 2023-it, paralajmëron shefja e FMN-së

Një e treta e ekonomisë globale do të jetë në recesion gjatë këtij viti ka paralajmëruar shefja e Fondit Monetar Ndërkombëtar. Kristalina Georgieva tha se 2023 do të jetë më  i ashpër se viti i kaluar ndërsa BE, SHBA dhe Kina shohin ekonomitë e tyre që ngadalësohen.

Kjo vjen pas luftës në Ukrainë, çmimeve në rritje dhe normave të larta të interesit si dhe shpërndarja e COVID në Kinë rëndojnë mbi ekonominë globale.

Në tetor, FMN e rishikoi sërish rritjen ekonomike në botë duke e projektuar me ulje, kjo pasi Bankat Qendrore nëpër botë kanë filluar me politikën agresive të rritjes së normave të interesit për të luftuar çmimet e larta. Ndërkohë Kina, e anuloi politikën e saj Zero Covid dhe rifilloi të hapte ekonominë, edhe pse virusi vijon të shpërndahet me shpejtësi.

Lexo edhe: FMN e shqetësuar për një flluskë në pasuritë e paluajtshme?!

“Edhe vendet që nuk do të jenë në recesion, sërish do ndjehen sikur janë në një situatë të tillë” – tha shefja e FMN-së.

Zonja Georgieva paralajmëroi se Kina, ekonomia e dytë më e madhe në botë, do të ketë një fillim të vështirë në 2023-in dhe kjo do të dërgojë valë negative nëpër ekonomitë botërore.

FMN bën vazhdimisht raporte mbi ekonomitë nëpër botë dhe roli kyç i saj është paralajmërimi mbi ngjarjet e zymta ekonomike. Kështu në raportin e fundit tregohej se në Kinë aktiviteti i fabrikave u ngadalësua për të tretin muaj radhazi dhe me shpejtësinë më të madhe në tre vite. Në vendin aziatik edhe çmimet e banesave të reja ranë për të gjashtin muaj radhazi. Presidenti Xi Jinping, të shtunën në një adresim publik bëri thirrje për më shumë përpjekje dhe bashkim, ndërsa theksoi se Kina po hyn në një fazë të re./ BBC