Miliarderi spanjoll dhe themeluesi i “Zara”-s, Amancio Ortega, ka bërë një tjetër lëvizje të fuqishme në tregun e pasurive të paluajtshme, duke blerë një ndërtesë zyrash në një nga bulevardet më të njohura të Barcelonës për plot 250 milionë euro (283 milionë dollarë).
Ndërtesa prej 28 mijë metrash katrorë ndodhet në Avenida Diagonal, dhe aktualisht është e dhënë me qira për shtëpinë botuese prestigjioze “Planeta”. Aseti u ble nga gjigandi amerikan i investimeve Blackstone, përmes fondacionit investues të Ortega-s, Pontegadea.
As Ortega, as Blackstone nuk kanë komentuar publikisht për marrëveshjen, por lëvizja shihet si pjesë e strategjisë afatgjatë të biznesmenit për të konsoliduar pozicionin e tij në sektorin e pasurive të paluajtshme, veçanërisht në pronat elitare në qytetet kryesore të Europës dhe Amerikës së Veriut.
Lexo gjithashtu: Mos e injoro! Microsoft do fshijë fjalëkalimet, afati po afron!
Një portofol që nuk ndalet së rrituri
Pontegadea është kthyer në një nga mekanizmat më të fuqishëm të investimeve në pasuri të paluajtshme në Evropë. Aktualisht, kompania zotëron mbi 20 miliardë dollarë në prona, përfshirë kulla zyrash luksoze, objekte tregtare, hotele dhe një seri investimesh strategjike në sektorin e energjisë dhe logjistikës.
Ortega, i cili kontrollon 59.29% të Inditex-it, kompanisë mëmë të Zara-s, është shquar gjithmonë për strategjinë e tij të qetë por të fuqishme të investimeve, duke lënë një gjurmë të thellë jo vetëm në industrinë e modës, por edhe në financat globale.
Kjo blerje në zemër të Barcelonës përbën jo vetëm një tregues të qartë të besimit të tij në tregun spanjoll, por edhe një sinjal për rritjen e interesit ndaj pronave të klasit të parë në Europë, pavarësisht sfidave ekonomike globale.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
