YouTube ka ndërmarrë një masë të re kundër përmbajtjes mashtruese, duke mbyllur dy kanale të njohura që publikonin video të rreme filmash të krijuara me ndihmën e inteligjencës artificiale.
Platforma konfirmoi se ka fshirë kanalin Screen Culture, me bazë në Indi, dhe KH Studio, nga Shtetet e Bashkuara, të cilat së bashku kishin mbi 2 milionë abonentë dhe kishin grumbulluar më shumë se 1 miliard shikime.
Sipas YouTube-it, këto kanale kanë shkelur politikat e platformës duke publikuar përmbajtje që mashtronte audiencën, duke i paraqitur videot si trailera bindës, por jozyrtarë, për filma që ende nuk ishin publikuar ose që nuk ekzistonin në formën e paraqitur.
Ndryshe nga përdorimi i inteligjencës artificiale për qëllime argëtuese apo eksperimentale, këto kanale kombinonin pamje të krijuara me AI me skena reale nga filma ekzistues, duke krijuar trailerë që ngjanin shumë me materiale zyrtare.
Lexo edhe: Modele reale dhe AI, Zara shpejton prodhimin e imazheve të modës
Një nga rastet më të përfolura ishte ai i kanalit Screen Culture, i cili publikoi 23 versione të ndryshme të një traileri për filmin “Fantastic Four: First Steps”. Disa prej këtyre videove arritën të grumbullojnë më shumë shikime sesa traileri zyrtar i filmit, duke rritur shqetësimet për konfuzion dhe dezinformim të publikut.
Vendimi i YouTube-it vjen në një kohë kur përdorimi i inteligjencës artificiale në industrinë e filmit dhe të përmbajtjeve digjitale po rritet me ritme të shpejta, duke nxitur debate mbi kufijtë etikë të teknologjisë dhe rrezikun e krijimit të materialeve që mund të duken reale, por që në fakt nuk kanë ekzistuar kurrë.
Me këtë veprim, YouTube sinjalizon një qasje më të ashpër ndaj përmbajtjeve që shfrytëzojnë AI-në për të mashtruar audiencën, duke theksuar rëndësinë e transparencës dhe besueshmërisë në ekosistemin e platformës.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
