Për dekada me radhë, Warren Buffett, kryetari i Berkshire Hathaway, ka ndarë jo vetëm këshilla mbi biznesin dhe investimet, por edhe mbi atë që ai beson se e bën një jetë të vlefshme. Në shumë mënyra, karriera e tij flet vetë. Deri në momentin kur u tërhoq si CEO në fund të vitit 2025, pasuria personale e Buffett-it arriti rreth 150 miliardë dollarë, sipas Bloomberg Billionaires Index. Kompania që ai ndërtoi, dikur një biznes i vogël tekstilesh në New England, sot vlen më shumë se 1 trilion dollarë.
Megjithatë, Buffett 95-vjeçar thotë se ekzistojnë masa shumë më të rëndësishme të vlerës personale sesa pasuria financiare. “Ka një cilësi që unë e vlerësoj jashtëzakonisht shumë te njerëzit, sepse të gjithë mund ta kenë, dhe kjo është mirësia,” tha ai në intervistën speciale “Warren Buffett: A Life and Legacy” në CNBC me gazetaren Becky Quick. Sipas Buffett-it, mirësia është diçka që “nuk kushton asgjë”. “Nuk i përket asnjë feje, asnjë ideologjie, asnjë grupi. Atëherë, pse në botë të mos jesh i sjellshëm?” shtoi ai.
Lexo edhe:Bota e mediave në prag të një përmbysjeje nga AI?!
Duke ndjekur gjurmët e një mentori
Buffett beson se respekti ndaj njerëzve nuk është vetëm moral, por edhe praktik — madje i dobishëm në biznes. Ai e lidh këtë bindje me shembullin e Tom Murphy, ish-CEO i Capital Cities/ABC dhe një prej miqve të tij më të ngushtë. “Nuk njoh askënd që kishte marrëdhënie më të mira me njerëzit — qoftë në blerjen e bizneseve, drejtimin e tyre apo zgjidhjen e problemeve personale. Ishte thjesht pjesë e karakterit të tij,” tha Buffett.
Këshilla më e mençur e Murphy-t, sipas Buffett-it, ishte e thjeshtë: “Mund t’i thuash dikujt të shkojë në ferr edhe nesër.”
Buffett pranon se ndonjëherë mund të jetë tundues të reagosh ashpër, por pyet: “Çfarë fiton realisht? Ndoshta vetëm ndihesh pak më mirë për një moment.”
Kjo nuk do të thotë se Buffett apo Murphy ishin naivë apo tepër optimistë në biznes. “Murphy nuk ishte një idealist i verbër. Ai mori vendime shumë të vështira dhe të mëdha,” theksoi Buffett.
Por në planin afatgjatë, thotë ai, edhe nëse duhet të jesh i prerë dhe strategjik, do të dalësh më i fituar nëse i trajton njerëzit me ngrohtësi. Ai kujtoi një reflektim të ish-kryetarit të Fiat-it, Gianni Agnelli: “Kur plakesh, e ke reputacionin që meriton.”
Buffett beson se ia vlen që çdokush të ndërtojë një reputacion mirësie. “Nuk heq dorë nga asgjë. Është e lehtë, dhe e merr mbrapsht me interes,” tha ai. Sipas tij, bota do të ishte një vend më i lumtur nëse çdo mëngjes njerëzit do t’i thoshin vetes: “Sot do të më ndodhin gjëra të mira dhe të këqija — por unë mund të jem i sjellshëm me këdo.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
