Walmart është bërë kompania e parë tradicionale e shitjes me pakicë në botë që arrin një vlerë tregu prej 1 trilion dollarësh (rreth 730 miliardë paund), duke hyrë kështu në një “klub elitar” të dominuar kryesisht nga kompani teknologjie.
Ky moment historik reflekton rritjen e fortë të biznesit online të gjigantit amerikan të retail-it, suksesin në tërheqjen e konsumatorëve të ndjeshëm ndaj çmimeve, si edhe besimin e Wall Street në investimet e Walmart në inteligjencën artificiale (AI).
Me këtë arritje, Walmart i bashkohet kompanive me kapitalizim mbi 1 trilion dollarë, ku dominojnë emra të teknologjisë si Nvidia dhe Alphabet (Google). Aksionet e kompanisë janë rritur ndjeshëm muajt e fundit dhe vetëm të martën shënuan një rritje mbi 3%.
Walmart mbetet rrjeti më i madh fizik i shitjes me pakicë në SHBA dhe është i njohur për politikat e çmimeve të ulëta. Kompania ka përfituar nga tendenca e konsumatorëve me të ardhura më të larta që po kalojnë drejt produkteve më të lira, në një kohë kur tregu i punës po ftohet dhe inflacioni vijon të ushtrojë presion mbi buxhetet familjare. Paralelisht, shërbimet e shpejta të dërgesës në shtëpi kanë tërhequr klientë nga pothuajse të gjitha kategoritë e të ardhurave.
Në raportin e fundit financiar të publikuar në nëntor, Walmart raportoi rritje të fortë të shitjeve në sektorë kyç si ushqimet dhe veshjet.
“Walmart është më i mbrojtur se pothuajse çdo kompani tjetër, falë ofertës sonë të fortë të vlerës për konsumatorin,” është shprehur drejtori financiar i kompanisë, John David Rainey.
Drejtuesit e Walmart kanë deklaruar gjithashtu se ndikimi i tarifave tregtare të vendosura nga administrata e Presidentit të SHBA, Donald Trump, ka qenë më i kufizuar nga sa pritej fillimisht. Edhe pse tarifat kanë rritur çmimet e disa produkteve si elektronika dhe lodrat, përmasat dhe fuqia negociuese e Walmart e kanë ndihmuar kompaninë ta përballojë këtë presion më mirë se rivalët e saj. Biznesi online i Walmart e ka pozicionuar kompaninë si një konkurrent serioz të Amazon. Shitjet online në SHBA u rritën me 28% në tre muajt deri më 31 tetor, të nxitura nga porositë online dhe reklamat digjitale. Megjithatë, Amazon mbetet shumë përpara në vlerë tregu, me rreth 2.6 trilion dollarë.
Entuziazmi i investitorëve në Wall Street është ushqyer edhe nga adoptimi i inteligjencës artificiale nga Walmart. Kompania njoftoi në tetor një partneritet me OpenAI, që u mundëson klientëve dhe anëtarëve të Sam’s Club të planifikojnë vakte, të rimbushin furnizimet ose të zbulojnë produkte të reja përmes një bisede të thjeshtë në chat. Arritja e pragut prej 1 trilion dollarësh përkoi me javën e parë të John Furner si CEO i ri i kompanisë, i cili është shprehur hapur në mbështetje të investimeve në AI dhe transformimin digjital të Walmart. Vendimi i Walmart për të transferuar aksionet nga Bursa e Nju Jorkut (NYSE) në Nasdaq, bursë e njohur për kompanitë e teknologjisë, e ka përforcuar më tej mesazhin se kompania synon të pozicionohet si një aktor i fortë digjital, jo thjesht si një retailer tradicional.
Edhe pse Walmart është kompania e parë tradicionale e retail-it që hyn në “klubin e 1 trilion dollarëve”, kjo listë vijon të dominohet nga gjigantët e teknologjisë. Ndërkohë, Berkshire Hathaway e kaloi këtë prag në vitin 2024, ndërsa kompania farmaceutike Eli Lilly e tejkaloi përkohësisht vlerën 1 trilion dollarë vitin e kaluar, përpara se të binte sërish nën këtë nivel.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
