Realizimi i verërave në Librazhd po vijon mbi një traditë të kahmotshme ilire. Pranë parkut malor ndërshtetëror të Shebenik Jabllanicës, në kodrat e Karnavecit, në Qukës e Hotolisht vreshtat përbëjnë 45 % të sipërfaqes me drurë frutorë e 1 % të tokës së punuar. Banorët merren edhe me selitjen e hardhive në krijimin e e pjergullave mes mureve, tarracave e pemëve duke u mbështjellë e kacavjerrë hardhitë në gjendje natyrale.
Varietet e verërave si Hungarezja “Tokaj” e mbërritur në 1976 -ën në Librazhd, Shesh i Zi e Shesh i Bardhë dhe Kabërneti janë si në shtëpinë e tyre në Kantinën “Librazhdi” brenda buteve të shëndetshme ose si “gra shtatzëna” shprehet Kuteli në veprën e pasur letrare.
E veçanta e Kantinës, vera “Tokaj” me ngjyrë kashte të çelur e nuanca të jeshiles, realizohet nga vreshti i kultivarit me të njëjtin emër, vreshta të tokës pjellore Karnavec Slatinë. Mushti i verës përftohet nga shtrydhja e lëngut dhe jo shtypja në presë. Ai përmban 13 % alkol.
Bashkëudhëtarët në Enologji, kimistët Rrahman dhe Luljeta Gjeta, entuziastë për rikthimin e disa vlerave të paharruara nga profesionistët si aroma dhe shija e Kabërnetit dhe Tokajit, (vlerësime të ekspertëve në vitet ’60 , ’70) dëshmojnë se ruajtja e traditës është shenjë e identitetit kombtar.
E reja sipas drejtuesit Gjeta qëndron te krijimi i një etikete për varietetin “Shesh i Zi” me një pikturë e cila ka pamje në miniaturë nga trualli i begatë dhe ndërtesa e Kantinës “Librazhdi”.
Përzierjet e likernave nga zonja e shtëpisë, Luljeta, sigurojnë një kombinim të mirë për vlerat e shëndetit, duke e pasuruar pijen e rakisë me bimën mjekësore të shafranit. Sivjet ka qënë një periudhë e vështirë prej lagështirave për vreshtarinë, por viti 2017 sjell për shijuesit e verës së Librazhdit në tryeza kualitetin e verës së kuqe me pako pesë litërshe me një çmim konkurues në raport me disa kantina.
Oborri i Kantinës së familjes Gjeta, me shtrirje prej mijëra metrash, fton në festat e Gushtit, të vjeljeve të pritshme të Shtatorit, Tetorit vizitorët e luginës së Shkumbinit. Vlerësimi si pjesë e UNESCO-s e një zone të Parkut shqiptaro maqedonas të Malit të Shebenikut po e rrit ardhjen e turistëve të natyrës së egër por të bukur. Rizgjimi i shijes së verës dhe tharmimet e tjera, vendbanimi arkeologjik kodrinor i Selcës pak kilometra më tutje në Proptisht, si dhe lidhja me Elbasanin, Përrenjasin, Rrajcën, Ohrin, Strugën e Dibrën, na parashtron një hartë turistike më intriguese për ta eksploruar arealin me disa pamje harmonike si fijet e kostumit popullor të Rrajcës.
