Unioni i Transportit Publik njofton se do të përgjysmojnë numrin e urbanëve në Tiranë

Përfaqësuesit e Unionit të Transportit Publik kanë vendosur të operojnë me gjysmën e kapacitetit të mjeteve urbane duke nisur nga sot.

Përmes një njoftimi të shpërndarë për mediat, bëhet me dije se shkak për këtë vendim është bërë kriza që po kalon ky sektor, fillimisht prej pandemisë e më tej me rritjen e çmimit të naftës, largimi i stafit dhe mosreagimi nga institucionet përgjegjëse për plotësimin e kërkesave ekonomike të premtuara.

Lexoni: Drejtoria e Transportit Rrugor ul çmimin me 43% për rinovimet e patentave

“Të nderuar, Përfaqësuesit e Unionit të Transportit Publik, ju venë në dijeni se pas një viti e gjysmë nga rihapja e transportit publik, ndodhemi ende në pikën fillestare ku asnjë nga institucionet përgjegjëse nuk ka marrë asnjë masë apo plotësim të kërkesave ekonomike të premtuara.

Të gjendur në këtë situatë të pafuqishme ekonomike për të përballuar ecurinë e transportit dhe sidomos pas rritjes së vazhdueshme e të pandërprerë të çmimit të naftës dhe të largimit të stafit, jemi të detyruar që të operojmë nga datë 18.10.2021 me gjysmën e kapacitetit të flotës së mjeteve urbane. Jemi në këtë situatë pas shumë kërkesash dhe njoftimesh si në institucionet vendore dhe ato qendrore ku mos reagimi i tyre na bën që të shkojmë deri në një kapitullim ekonomik të këtij sektori. Duke kërkuar mirëkuptimin e qytetarëve, mbetemi në pritje të zgjidhjes së kërkesave tona nga ana e institucioneve përgjegjëse” thuhet në njoftimin zyrtar të Unionit të Transportit Publik.