Turqia po shtrëngon rregullat për përdorimin e rrjeteve sociale. Partia në pushtet, Partia e Drejtësisë dhe Zhvillimit, depozitoi të mërkurën në Parlament një projektligj që ndalon përdorimin e rrjeteve sociale nga të miturit nën moshën 15 vjeç.
Me këtë nismë, Turqia ndjek shembullin e Australisë, Greqisë, Polonisë dhe disa vendeve të tjera evropiane, të cilat kanë vendosur kufizime të ngjashme për shkak të shqetësimeve në rritje mbi ndikimin e rrjeteve sociale në shëndetin mendor dhe sigurinë e të rinjve.
Sipas projektligjit, kompanitë e rrjeteve sociale do të jenë të detyruara të zhvillojnë sisteme të verifikimit të moshës, si edhe mjete efektive të kontrollit prindëror. Përmbajtja e paligjshme ose e dëmshme do të duhet të bllokohet nga platformat brenda një ore në rastet urgjente, ndërsa masa shtesë sigurie do të zbatohen edhe për llogaritë e të miturve mbi 15 vjeç.
Mosrespektimi i rregullave parashikon gjoba të rënda, që mund të arrijnë deri në 3% të xhiros globale të kompanive, si edhe kufizime në shpejtësinë e aksesit në platformat përkatëse.
Lexo edhe: Satelitë rusë dyshohet se kanë përgjuar komunikimet e satelitëve kritikë evropianë
Projektligji zgjeron kontrollin edhe në sektorin e videolojërave, të cilat do të klasifikohen sipas nivelit të sigurisë për fëmijët. Një përfaqësues i partisë deklaroi se kompanitë e rrjeteve sociale dhe ato të industrisë së gaming kanë afat gjashtë muaj për t’u përshtatur me kërkesat e reja ligjore.
Turqia tashmë zbaton një kornizë të ashpër rregullatore për platformat digjitale dhe, në disa raste, ka bllokuar shërbime të huaja online.
Sipas organizatës kundër censurës IFOD, lista e faqeve dhe përmbajtjeve të ndaluara përmban rreth 1,2 milionë regjistrime, një shifër që nënvizon shkallën e kontrollit shtetëror në hapësirën digjitale.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto