Bashkimi Evropian ka vendosur të shtyjë zbatimin e kundërmasave tregtare ndaj Shteteve të Bashkuara nga dita e hënë deri në fillim të gushtit, për të fituar më shumë kohë në funksion të arritjes së një marrëveshjeje. Në një konferencë për shtyp të dielën, Presidentja e Komisionit Evropian, Ursula von der Leyen, iu referua një letre të dërguar nga Shtetet e Bashkuara një ditë më parë, ku kërcënohej me vendosjen e një tarife prej 30% mbi eksportet evropiane, nëse nuk arrihet një marrëveshje deri më 1 gusht.
“Për këtë arsye, do të zgjasim pezullimin e kundërmasave tona deri në fillim të gushtit,” deklaroi ajo gjatë fjalës së saj në Bruksel. “Njëkohësisht, do të vazhdojmë përgatitjet për masa të mëtejshme, në mënyrë që të jemi plotësisht të përgatitur.”Von der Leyen theksoi se BE-ja gjithmonë ka treguar se preferon një zgjidhje të negociuar dhe kjo mbetet e pandryshuar. “Do të përdorim kohën që kemi në dispozicion deri më 1 gusht për të negociuar.”
Në mesin e prillit, Bashkimi Evropian kishte deklaruar pezullimin e përkohshëm, deri më 14 korrik, të kundërmasave të planifikuara ndaj eksporteve amerikane në vlerën e 21 miliardë eurosh (25 miliardë dollarë). Ato masa ishin shpallur më herët si kundërpërgjigje ndaj tarifës 25% të vendosur nga administrata amerikane për të gjitha importet e çelikut dhe aluminit.
Lexo edhe: Cila ekonomi europiane rrezikon më shumë nga tarifat e SHBA-së?
Ndërkohë, BE-ja ka qenë duke përgatitur edhe një raund tjetër masash kundërpërgjigjëse ndaj tarifave të reja të shpallura nga Presidenti amerikan, Donald Trump. Të dielën, Von der Leyen konfirmoi se blloku me 27 vende anëtare ka përgatitur një “listë të dytë të mundshme kundërmasash”, ndërsa ka kërkuar gjithashtu të zgjerojë marrëdhëniet tregtare me vende të tjera, duke përmendur një marrëveshje të lirë tregtie “të madhe dhe të rëndësishme” me Indonezinë.
Sipas Zyrës së Përfaqësuesit të Tregtisë së SHBA-së, vendet anëtare të BE-së përbëjnë partnerin më të madh tregtar të Amerikës, me një vlerë prej afro 976 miliardë dollarësh në shkëmbime të dyanshme mallrash në vitin 2024.
Von der Leyen e përmbylli qëndrimin e saj me theksin se BE-ja mbetet e përkushtuar ndaj një zgjidhjeje përmes dialogut, duke theksuar gjithashtu që “pak ekonomi në botë i afrohen nivelit të hapjes dhe përkushtimit ndaj praktikave të ndershme tregtare që ka Bashkimi Evropian”.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
