TikTok do të nisë në javët në vijim implementimin e një teknologjie të re për identifikimin e moshës së përdoruesve në të gjithë Evropën, në një përpjekje për të përmbushur kërkesat rregullatore dhe për të kufizuar aksesin e fëmijëve nën moshën 13 vjeç në platformë. Sistemi i ri do të analizojë të dhëna nga profili i përdoruesit, përmbajtjen e publikuar dhe modelet e sjelljes online, për të vlerësuar nëse një llogari i përket një të mituri.
Ky zhvillim vjen në një moment presioni të shtuar për platformën në pronësi të ByteDance, e cila po përballet paralelisht edhe me sfida ligjore në Shtetet e Bashkuara. Një gjykatës në shtetin e Delaware pritet të shqyrtojë kërkesën e TikTok për rrëzimin e një padie të ngritur nga prindërit e pesë fëmijëve nga Mbretëria e Bashkuar, të cilët humbën jetën vitin e kaluar gjatë realizimit të video-ve “challenge” dhe “prank”.
Në padi pretendohet se algoritmet e TikTok kanë promovuar përmbajtje të rrezikshme për të miturit, përfshirë të ashtuquajturën “Blackout Challenge”, një sfidë që inkurajon ndalimin e përkohshëm të frymëmarrjes dhe që mund të çojë në dëmtime serioze neurologjike apo vdekje. Sipas dokumenteve gjyqësore, disa prej viktimave ishin nën moshën minimale të lejuar për përdorimin e platformës.
“ByteDance ka dëmtuar këta fëmijë, pasi drejtuesit e kompanisë ishin në dijeni se vendimet e tyre teknologjike mund të sillnin pasoja fatale”, thuhet në padinë e depozituar në Gjykatën e Delaware.
Nga ana e saj, TikTok ka reaguar duke shprehur ngushëllime për familjet e prekura dhe duke deklaruar se platforma ndalon rreptësisht çdo përmbajtje që promovon apo nxit sjellje të rrezikshme. Kompania thekson se masat e reja teknologjike synojnë të forcojnë sigurinë e fëmijëve dhe të parandalojnë përdorimin e platformës nga të miturit pa leje.
Pesë familjet britanike kërkojnë që përmes procesit gjyqësor të zbardhen rrethanat e fundit të jetës së fëmijëve të tyre dhe të vendoset përgjegjësi për ekspozimin e të miturve ndaj përmbajtjeve potencialisht fatale. Ndërkohë, vendosja e teknologjisë së re të detektimit të moshës në Evropë shihet si një hap i rëndësishëm drejt rritjes së kontrollit dhe mbrojtjes së përdoruesve më të rinj në rrjetet sociale.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
