TikTok njoftoi sot se do të nisë në javët e ardhshme shpërndarjen e një teknologjie të re për zbulimin e moshës në të gjithë Evropën, në një kohë kur platforma në pronësi të ByteDance po përballet me presion në rritje nga autoritetet për të identifikuar dhe hequr më mirë llogaritë e fëmijëve nën 13 vjeç.
Sistemi, i cili nuk ishte raportuar më parë, vjen pas një pilotimi njëvjeçar në Evropë. Ai analizon informacionin e profilit, videot e postuara dhe sinjalet e sjelljes së përdoruesit për të vlerësuar nëse një llogari mund t’i përkasë një të mituri. TikTok theksoi se llogaritë e sinjalizuara nga kjo teknologji nuk do të fshihen automatikisht, por do të shqyrtohen nga moderatorë të specializuar.
Lexo edhe:Si do të ushqejë bota 10 miliardë njerëz deri në 2050-ën? Shkenca ka përgjigjen
Shtimi i mbikëqyrjes rregullatore
Zbatimi i këtij sistemi vjen ndërsa autoritetet evropiane po kontrollojnë gjithnjë e më shumë mënyrat se si platformat verifikojnë moshën e përdoruesve, veçanërisht nën rregullat strikte të mbrojtjes së të dhënave personale. Shqetësimet kryesore janë se metodat aktuale ose nuk janë efektive, ose janë tepër ndërhyrëse ndaj privatësisë.
Vitit të kaluar, Australia vendosi ndalimin e parë në botë për përdorimin e rrjeteve sociale nga fëmijët nën 16 vjeç, ndërsa Parlamenti Evropian po diskuton vendosjen e kufijve të moshës për platformat sociale. Po ashtu, Danimarka ka propozuar ndalimin e rrjeteve sociale për të rinjtë nën 15 vjeç.
Sipas TikTok, pilotimi në Mbretërinë e Bashkuar çoi në mbylljen e mijëra llogarive shtesë të fëmijëve nën 13 vjeç.
Kompania pranoi se, pavarësisht përpjekjeve të shumta globale, ende nuk ekziston një metodë e pranuar ndërkombëtarisht për të verifikuar moshën e përdoruesve duke ruajtur plotësisht privatësinë.
Për rastet e apelimeve ndaj ndalimeve, TikTok do të përdorë teknologjinë e vlerësimit të moshës përmes fytyrës nga kompania e verifikimit Yoti, si dhe kontrolle me kartë krediti dhe dokumente identifikimi zyrtare. Edhe Meta përdor Yoti për verifikimin e moshës në Facebook.
TikTok tha se teknologjia e re është zhvilluar posaçërisht për Evropën për të qenë në përputhje me kërkesat rregullatore të rajonit. Gjatë zhvillimit të saj, kompania ka bashkëpunuar me Komisionin Irlandez të Mbrojtjes së të Dhënave, që është autoriteti kryesor i privatësisë për TikTok në BE.
Përdoruesit evropianë do të njoftohen ndërsa sistemi i ri fillon të zbatohet në vendet e tyre.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
