Aksionet e Teslës u rritën me mbi 4% të premten pas një rënieje të thellë prej 14% një ditë më parë, që zhduki mbi 150 miliardë dollarë nga vlera e tregut. Shkaku? Një përplasje e ashpër publike mes Elon Musk dhe Donald Trump.
Gjithçka nisi nga kritika e Musk ndaj projektbuxhetit të Trump, e më pas u përshkallëzua kur Musk tha se Trump nuk do të ishte zgjedhur pa ndihmën e tij. Trump reagoi menjëherë duke paralajmëruar ndërprerje të subvencioneve dhe kontratave për Tesla dhe SpaceX.
“Mënyra më e lehtë për të kursyer miliarda është të ndërpresim kontratat e Elon-it,” shkroi Trump në Truth Social.
Pavarësisht goditjes, investitorët mbeten të ndarë. Një pjesë frikësohet se një rikthim i Trump mund të vonojë projektin ambicioz të Tesla-s për robotaksi – makina pa shofer që pritet të testohen këtë muaj në Teksas.
Lexo edhe: “Pa telefona para 14 vjeç, pa rrjete sociale para 16”, alarmi për ndikimin e ‘Big Tech’
Ndërkohë, vëmendje të madhe po tërheq edhe SpaceX, e cila ka marrë miliarda nga NASA për dërgime në hapësirë, dhe Starlink, që kohët e fundit nënshkroi marrëveshje në vende si Arabia Saudite, India dhe Bangladeshi.
Luhatjet e forta në bursë tregojnë pasigurinë në rritje: lidhjet politike që dikur e ndihmuan Musk, tani mund të kthehen në bumerang.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
