Ted Sarandos, bashkë-CEO i Netflix, nuk është fans i librave klasikë të menaxhimit. Nuk i mban në çantë, në zyrë apo mbi komodinë. Në fakt, ai thotë se nuk lexon pothuajse fare libra menaxhimi. Në vend të tyre, Sarandos zgjedh romane letrarë, të cilët, sipas tij, i japin mësimet më të forta për lidershipin.
Libri i tij i preferuar? “Typhoon”, një novelë e vitit 1902 nga Joseph Conrad, që rrëfen historinë e një kapiteni anijeje me avull dhe ekuipazhit të tij, teksa përballen me një stuhi të fuqishme në det. “Në pamje të parë nuk duket si një histori menaxhimi, por për mua është historia më e fuqishme e lidershipit që kam lexuar ndonjëherë,” – tha Sarandos në një intervistë për serinë CNBC ‘Leaders Playbook’. “E lexoj vazhdimisht, sepse çdo herë zbuloj diçka të re.”
Si ndryshon kuptimi i lidershipit me kalimin e kohës
Kur Sarandos e lexoi librin për herë të parë, rreth 20 vite më parë, ai e shihte kapitenin si një figurë të pamatur, pothuajse të papërgjegjshme, që rrezikonte veten dhe familjen e tij. Sot, pas përvojës së gjatë në biznes dhe drejtim, ai sheh një mesazh krejt tjetër: “Në jetë dhe në biznes merr shumë vendime që nuk dalin ashtu siç i ke parashikuar,” – shpjegon ai. “Testi i vërtetë i lidershipit është: si e menaxhon situatën kur gjërat shkojnë ndryshe nga plani.”
Lexo edhe: Inflacioni “godet xhepat”, si u rritën qiratë, bulmeti dhe energjia gjatë festave
Mësimet nga Netflix dhe Reed Hastings
Sarandos iu bashkua Netflix-it në vitin 2000 si drejtues i operacioneve të përmbajtjes. Një pjesë e madhe e mënyrës së tij të të menduarit për lidershipin, sipas tij, është formësuar nga bashkëthemeluesi dhe ish-CEO i kompanisë, Reed Hastings. “Mësimi më i madh që kam marrë prej tij është: zgjidh njerëzit më të mirë, jepu mjetet për të bërë punën më të mirë të jetës së tyre dhe mos u bëj pengesë.”
Ai kujton një moment kyç, kur veproi me autonomi të plotë dhe mori një rrezik të madh financiar: rreth një dekadë pasi ishte bashkuar me Netflix-in, Sarandos shpenzoi 100 milionë dollarë për të prodhuar serialin e parë origjinal të kompanisë, House of Cards, duke e miratuar për dy sezone, pa kërkuar leje paraprakisht nga Hastings. “Kur më pyeti: ‘Pse do ta bëje këtë?’, i thashë: ‘Reed, është një llogari e thjeshtë risk-fitim. Nëse dështon, thjesht kemi paguar shumë për një serial – gjë që na ka ndodhur edhe herë të tjera. Por nëse ka sukses, mund të transformojë krejt biznesin.’”
Edhe liderë të tjerë frymëzohen nga letërsia
Sarandos nuk është i vetmi drejtues i madh që gjen mësime lidershipi në letërsi artistike.
- Themeluesi i Amazon, Jeff Bezos, është frymëzuar nga romani “The Remains of the Day” i Kazuo Ishiguro, sipas librit biografik The Everything Store.
- Bashkëthemeluesi i Microsoft, Bill Gates, ka theksuar vazhdimisht vlerën e leximit të romaneve, duke shkruar se disa prej tyre “të zbulojnë si funksionojnë realisht gjërat e rëndësishme”.
Sipas profesoreshës së lidershipit në Northwestern University, Brooke Vuckovic, çdokush mund të nxjerrë mësime praktike nga romanet, nëse i lexon në mënyrë reflektuese: duke analizuar motivimet e personazheve, konfliktet dhe paralelizmat me situata reale pune. “Liderët më të mirë kërkojnë vazhdimisht mënyra për të zhvilluar veten,” – thotë ajo. “Letërsia artistike është një mjet i nënvlerësuar, i fuqishëm, me kosto të ulët dhe madje i këndshëm për zhvillim personal, nëse lexohet siç duhet.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
