Gjatë Ministerialit në Ningbo mes vendeve të Evropës Qendrore e Lindore dhe Kinës, Ministrja e Ekonomisë, Milva Ekonomi zhvilloi një takim bilateral me ministrin e jashtëm dhe të tregtisë të Hungarisë, Peter Szijjarto.
Në një njoftim për shtyp ministria Ekonomisë bën të ditur se, gjatë takimit të kërkuar paraprakisht nga pala hungareze, Ministri Szijjarto vuri theksin mbi integrimin evropian të Shqipërisë dhe propozoi vënien në dispozicion të një eksperti hungarez, i cili do të ofronte asistencë teknike në fazën paraprake të çeljes së negociatave, për plotësimin e kërkesave të “Aquis Communautaire” në kapitujt që lidhen me ekonominë dhe sipërmarrjen.
Ai njoftoi se, në korrik do të çelet në Tiranë një Zyrë Përfaqësimi për tregtinë, e cila do të ketë për qëllim të promovojë bashkëpunimin mes SME-ve shqiptare dhe hungareze si dhe njoftoi se, brenda kësaj vjeshte, kompania ajrore Hungareze Wizzair do të nisë fluturimet direkte midis Tiranës dhe Budapestit. Ministri u shpreh se, Hungaria është e interesuar për të ofruar asistencë teknike në fushën e menaxhimit të ujërave, ndërtimin e linjës së interkonjeksionit mes Manastirit dhe Elbasanit, duke ofruar mbështetje financiare dhe nga Banka hungareze EXIM.
Ministrja Ekonomi falenderoi qeverinë e Hungarisë për asistencën e dhënë deri me tani në rrugëtimin e Shqipërisë drejt BE, duke shprehur gatishmërinë për të mirëpritur asistencën teknike në çështjet e negocimit. Shqipëria e sheh me pozitivitet bashkëpunimin me Hungarinë në fushën e menaxhimit të ujërave dhe e mirëpret atë për një mundësi me Bashkinë e Tiranës, e cila është duke zbatuar një plan për zhvillimin dhe zgjerimin e kryeqytetit, ndërsa bashkëpunimi me Hungarinë mbetet edhe ndërhyrja për ndërtimin e rrjetit hekurudhor, apo bashkëpunimi në industrinë e turizëm-hotelerisë dhe përpunimit të produkteve agro-ushqimore, për të cilat Hungaria ka një përvojë të pasur.
Bashkëbiseduesit ranë dakord për mbledhjen e komisionit të përbashkët ekonomik, pas caktimit të bashkëkryetarit të këtij komisioni nga pala shqiptare, komision i cili do të adresojë çështjet e listuara më sipër.
Në kuadër të bashkëpunimit P2P (People to People), gjatë takimit, pala hungareze njoftoi akordimin e 20 bursave të plota për 20 studentë shqiptarë, të cilët dëshirojnë të ndjekin studimet universitare në Hungari, program ky i cili do të fillojë në shtator 2016.
/Agjencia Telegrafike Shqiptare
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Albanian
English