Ministri i Financave Arben Ahmetaj ka pritur ditën e premte ministrin e Financave të Kosovës, Avdullah Hotin.
Në takim ishin edhe drejtorët e përgjithshëm të Tatimeve dhe Doganave të të dy vendeve.
Takimi u organizua për të diskutuar mbi bashkëpunimin dypalësh deri më tani, çështjet e dakordësuara nga mbledhja e fundit e përbashkët e dy qeverive dhe problematikat që kërkojnë vëmendje.
“Kemi rënë dakord për një axhendë shumë intensive deri para mbledhjes së qeverive, për të parë çfarë kemi bërë, çfarë janë në proces dhe çfarë do të bëhet. Kryesisht në lehtësimin e mëtejshëm doganor, operacionet e përbashkëta dhe shkëmbimin e informacionit”, u shpreh Ahmetaj.
“Ne kemi bërë një rishikim të progresit që kemi arritur deri tani dhe identifikuam disa çështje që do të adresohen 2-3 javët e ardhshme, me qëllim që të miratohen në mbledhjet e qeverisë”, tha Ahmeti.
Eksportet shqiptare drejt Kosovës janë trefishuar në gjashtë vitet e fundit. Ahmetaj tha se para mbledhjes së qeverive do të mbahet një dëgjesë e përbashkët me sipërmarrësit e të dy vendeve.
“Për të dëgjuar bizneset prodhuese dhe ato eksportuese për problemet e tyre, se çfarë kërkesash kanë ata ndaj dy qeverive në funksion të të dy qeverive”, tha Ahmetaj.
Vitin e kaluar Kosova ishte tregu i dytë i eksporteve shqiptare me 200 milionë dollarë, ndërsa importet nga ky shtet ishin rreth 50 milionë dollarë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
