Dëshira e tyre është që një ditë shqiptarët të kenë markën e tyre shqiptare të motoçikletës, “Made in Albania”. Ata janë në fazën fillestare të projektimit të punës për ndërtimin e një motoçiklete sportive të aftë për lëvizur në një nga pistat sportive të Spanjës ku do të testohen motorrët e studentëve të shteteteve të ndryshme pjesëmarrëse në garën e quajtur “Motostudent”.
Studentët e këtij projekti mbajnë emrin “Prishtina Moto Team (FIMUP)” dhe janë një grup të rinjsh ambiciozë nga Kosova e Shqipëria që me nismë vullnetare kanë inicuar idenë për pjesëmarrjeje në garën ndërkombëtare të këtij lloji që mbahet vitin e ardhshëm në Spanjë.
Motorri për të cilin janë zotuar ta ndërtojnë të rinjët shqiptarë, duhet të jetë sportiv i kategorisë 250 kubikë, konform kritereve botërore të motoçiklizmit Moto 3.
Kjo garë është e bazuar në rregulloren dhe specifikat e kategorisë botërore të MOTO GP 3 (250 cc) dhe në të marrin pjesë universitete nga mbarë bota.
“Projekti në vetvete përmban ndërtimin e një motorri prototip, nga fillimi deri në fund”, tregon Aurel Kolldani.
Studentët shqiptarë do ta ndërtojnë motorrin nga zeroja me mbështetjen e universitetit të Prishtinës dhe do ta prezantojnë produktin e tyre në Tetor të vitit 2018 në Spanjë në datat e caktuara nga federata e motoçiklizmit spanjoll.
“I gjithë ky projekt mbështetet me punë vullnetare dhe gëzon mbështetje e bashkëpunim nga universiteti “Hasan Prishtina”; biznese në Prishtinë dhe dashamirës të motoçiklizmit apo të nismave mbarëshqiptare”, tregon inixhinieri i mekanikës, anëtar i grupit “Prishtina Moto Team” Aurel Kolldani, i cili bashkë me Durim Gashin, Bujar Llugaliun, Gurim Gashin, Egzon Zymberin, Agron Statovcin, Albulena Govorin, Valdrin Berishën dhe Uresa Mustafën kanë nisur punën për zhvillimin e këtij projekti inovativ.
Projekti bazohet në donacione dhe vetëfinancim, i cili synon zhvillimin e teknologjisë së motorrëve si mundësi për studentë nga mbarë bota për të shfaqur aftësitë e tyre teknologjike në projektimin dhe ndërtimin e motorrëve.
burimi: albinfo.ch
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
