Po sikur makina jote elektrike të mos kishte më nevojë për mekanik? Një grup studentësh universitarë në Holandë kanë ndërtuar një automjet elektrik që është projektuar për t’u çmontuar, diagnostikuar dhe riparuar lehtësisht nga vetë pronari.
Makina koncept, e quajtur Aria, është zhvilluar nga studentë të Universitetit TU/e Eindhoven dhe synon të reduktojë varësinë nga shërbimet e specializuara, shpesh të kushtueshme që sot janë pothuajse të domosdoshme për automjetet elektrike.
Pronarët e Aria-s mund ta lidhin telefonin direkt me makinën përmes një kablli USB-C dhe të përdorin një aplikacion diagnostikues që identifikon shpejt defektet. Aplikacioni përdor një model 3D të automjetit për t’i udhëzuar vizualisht përdoruesit drejt komponentit të dëmtuar.
“Me aplikacionin diagnostikues që kemi zhvilluar për makinën tonë, mjafton ta lidhësh makinën me telefonin përmes USB-C dhe ajo e kupton menjëherë që është lidhur,” shpjegon Marc Max Hoevenaars, student në TU/e Eindhoven dhe inxhinier softueri në projektin Aria.
“Nga aty, ne dimë saktësisht si ta rregullojmë, çfarë mjetesh na duhen dhe mund ta vëmë shumë shpejt makinën sërish në punë.”
Lexo edhe: Zhvillimi i “micro-apps”: kur njerëzit krijojnë vetë aplikacione në vend që t’i blejnë
Fuqia e riparimit në duart e përdoruesit
Studentët që qëndrojnë pas Aria-s thonë se projekti është një përgjigje ndaj kompleksitetit në rritje të automjeteve elektrike moderne, të cilat shpesh kërkojnë njohuri shumë të specializuara për t’u riparuar.
“Sigurisht që çdo makinë mund të riparohet, por ajo që shohim sot është një nevojë reale për ekspertizë të specializuar, sidomos te automjetet elektrike,” thotë Taco Olmar, menaxher i ekipit Aria. “Ajo që ne përpiqemi të bëjmë është t’i japim konsumatorit fuqinë për të riparuar vetë makinën e tij.”
Një tjetër element kyç i dizajnit është aksesueshmëria e baterisë. Ndryshe nga shumica e makinave elektrike, ku paketat e baterive janë të integruara fort në shasi, Aria përdor një sistem modular baterish, që mund të hiqen lehtësisht… me dorë.
“Është shumë e lehtë për t’u bërë vetë, thjesht me dorë. Po, çdokush mund ta bëjë,” thotë Callum Armour, inxhinier teknik në projekt.
E njëjta filozofi modulare aplikohet edhe te sistemi i transmetimit, i projektuar për thjeshtësi dhe akses të shpejtë. Edhe komponentët e jashtëm, si parakolpët dhe mbrojtëset, janë menduar të zëvendësohen shpejt dhe pa procedura të ndërlikuara.
Një sfidë për industrinë e makinave elektrike
Projekti Aria vë në pikëpyetje modelin aktual të industrisë së automjeteve elektrike, ku riparimet janë gjithnjë e më të mbyllura, të komplikuara dhe të varura nga rrjetet zyrtare të servisit. Qasja “riparoje vetë” e studentëve holandezë hap një debat të ri mbi të drejtën e riparimit, kostot e pronësisë dhe qëndrueshmërinë afatgjatë të makinave elektrike.
Edhe pse Aria mbetet një makinë koncept, ideja pas saj po tërheq vëmendje si një vizion alternativ për të ardhmen e lëvizshmërisë elektrike: më e thjeshtë, më transparente dhe më miqësore për përdoruesin.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
