Pasi kanë marrë dije në distancë për atë që nesër do të jetë profesioni i tyre, duket se studentët do të zhvillojnë po online edhe sezonin e parë të provimeve për këtë vit akademik. Të enjten Universiteti i Tiranës publikoi rregullat që duhet të ndjekin pedagogët dhe studentët për testimin e njohurive nga shtëpia.
Në rregullore thuhet se për çdo provim do të caktohen dy data të njëpasnjëshme në mënyrë që studentët të cilët mund të hasin vështirësi teknike apo e kanë të pamundur kryerjen e provimeve për arsye të ndryshme të mos penalizohen. Për procedurën e provimit online studentët do të njoftohen 10 ditë para përfundimit të mësimit.
Kohëzgjatja e provimit me gojë do të jetë 10-15 minuta, për testin me shkrim online 1-2 orë, për provimin e kryer nga shtëpia 2-3 orë. Pedagogu kërkon kartat e identitetit dy ditë para provimit ndërsa studentët këshillohen që të hyjnë në platformën “Microsoft Teams” 15 minuta para fillimit të provimit
Provimet që zhvillohen me gojë online regjistrohen kurse dokumentacionin elektronik i provimeve, pyetjet dhe kërkesat regjistrohen në CD.
Drejtues të Universiteteve kanë kërkuar nga Komiteti Teknik i Ekspertëve që studentët të rikthehen në auditore të paktën për zhvillimin e sezonit të provimeve, por deri më tani kërkesa nuk ka marrë përgjigje. Sakaq studentët kundërshtojnë provimet online madje edhe duke paralajmëruar bojkot të procesit.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
