Startup-i “Mëso Falas” fitues në nivel ndërkombëtar. Lindi gjatë pandemisë

Iniciativa “Mëso Falas”, është fituese e një Startup-i ndërkombëtar dhe aktive në nxjerrjen e videove edukuese në periudhën e Covid-19

Intervistë me Lisian Roseni, Lektues në projektin “Mëso Falas”

  1. Si lindi si ide, kur e keni nisur?

“Mëso Falas” ka lindur si ide në periudhën e izolimit nga Covid-19. Teknologjia ditët e sotme po kthehet në një aset shumë të rëndësishëm për ndërveprimin njerëzor dhe duke qenë se shumë shërbime dhe aktivitete po kthehen online ne menduam për një platformë në fushën e edukimit që të ishte shqip, online dhe falas për të gjithë. Duke qenë se “Mëso Falas” ka lindur nga një ekip profesionistësh të rinj, të cilët janë të specializuar në fushat e teknologjisë dhe edukimit menduam të bëjmë një lidhje mes të dyjave dhe të ofrojmë diçka të vlefshme për shoqërinë.

Implementimi i projektit “Mëso Falas” ka nisur para rreth 2 javësh me pjesëmarrjen tonë në një kompeticion Startup-i ndërkombëtar të organizuar nga Zero21. Mentorimi nga mentorët më të mirë të fushës na ndihmoi të zhvillonim më shumë idenë dhe të nisnim me implementimin e tij. Ky Startup është një mundësi për një financim të mundshëm nga investitor ndërkombëtar në mënyrë që të kemi mundësitë ekonomike për të garantuar vazhdimësinë e këtij shërbimi falas për të gjithë.

  1. Si e zhvilluat këtë ide?

Aktualisht kemi vetëfinancuar krijimin e një studio xhirimesh në kushte shtëpie si arsye e Pandemisë, por në të ardhmen synojmë të kemi një studio edhe më profesionale. Duke qenë se në gjuhën shqipe nuk ekzistojnë video profesionale dhe falas mbi “Hoë to”, pra “Si të”. Ne kemi menduar që për këdo pavarësisht se nuk është shumë i përditësuar me teknologjinë të mund të ketë mundësi me një klikim të shpejtë të mësojë çfarëdo që ka nevojë në gjuhën shqipe në lidhe me “Si të”. Mundësitë janë të pafundme në këtë aspekt, por si fillim ne do të ofrojmë video në tre kategori. Tutoriale për programet më të përdorura kompjuterike në mënyrë që dikush të aftësohet në këto programe dhe të ketë mundësi të avancojë në karrirën e tij ose të ketë mundësi të ndryshojë karrierën e tij lehtësisht. Tips & Ticks ose siç i quajmë në gjuhën shqipe kleçka. Do ofrojmë në këtë kategori kleçka të ndryshme që do lehtësojnë jetën e atij që i ndjek këto video me disa këshilla të shkurtra. Në fund kemi edhe kategorinë Soft Skills, në këtë kategori synojmë të ofrojmë trajnime kryesisht në aspektin e orientimit të karrierës dhe lehtësimit të zgjedhjeve jetësore për secilin.

  1. Si ndikoi Covid-19 në sipërmarrjen tuaj?

Situata e pandemisë na nxiti të ndërmerrnim një nisëm të tillë. Si arsye e izolomit të gjithë popullatës, menduam për një zgjidhje të thjeshtë në aspektin e edukimit, duke ofruar video profesionale në gjuhën shqipe. Sigurisht që kjo platformë nuk synon të konkurrojë edukimin formal, por të jetë një aset shtesë për edukimin e mëtejshmë jo vetëm për nxënësit apo studentët që ndjekin një edukim formal, por për këdo që ka dëshirë të mësojë pavarësisht moshës që ka.

  1. Pse dëshironi të ofroni një shërbim të tillë falas?

Në përgjithësi shoqëria shqiptare është pak skeptike ndaj iniciativave flas, por fakti se diçka ofrohet falas për komunitetin, kjo nuk do të thotë se nuk ka nevojë për burime financiare për tu zhvilluar dhe ndoshta edhe fitim të mundshëm. Platformat në Youtbe, mediat private dhe shumë aplikacione ofrohen falas për të gjithë, por kjo nuk do të thotë se nuk arrijnë të nxjerrin të ardhura nëpërmjet metodave të marketingut dhe reklamimit.

Komunitetet më të zhvilluara botërore janë globalizuar dhe zhvilluar si arsye e aftësisë që kishin për të ndarë me njëri-tjetrin. Komunitetet në internet janë zhvilluar duke pasur si bazë ndarjen e infomacionit. Edukimi është një e drejtë themelore e njeriut dhe për perspektivën tonë, njerëzit nuk kanë nevojë të paguajnë për t’u edukuar.

  1. Çfarë ju dallon nga të tjerët?

Ajo që na dallon nga konkurrentët e tjerë është qëllimi për të cilën po e bëjmë dhe mënyra me të cilën po e bëjmë këtë iniciativë. Qëllimi ynë është që të ofrojmë një platformë edukimi falas për të gjithë. Pavarësisht se platforma të ngjashme ekzistojnë në gjuhën angleze, në gjuhën shqipe është e vështirë të gjesh video lehtësisht të aksesueshme, profesionale dhe falas për të gjithë. Pavarësiht se mund të ekzistojnë kurse profesionale nga qendra të ndryshme ato nuk janë lehtësisht të aksesueshme dhe çka është më e rëndësishme mund t’i aksesosh kryesisht kundrejt një pagese. Ekzistojnë video sporadike edukuese falas në You Tube, por jo një platformë profesionale, e cila ofron cilësi jovetëm në përmbajtjen e videos, por edhe në aspektin e editimit.

Lexo: Themeluesi i StartupWeekend: kërkoni rritje por mos harroni misionin e biznesit

  1. Si e shihni të ardhmen e “Mëso Falas”, pra cilat janë projektet tuaja?

Në këto dy javët e fundit kemi hapur dhe promovuar iniciativën tonë në rrjetet sociale Facebook, Instagram dhe LinkedIn. Kemi publikuar 6 videot e para në platformën tonë në YouTube duke synuar publikimin e 3 ose 4 videove të reja në javë. Synimi pas rreth 6 muajsh është të kemi populluar kanalin tonë në YouTube me një numër të konsiderueshëm videosh dhe të kemi kaluar një pjesë të videove në një modul online me trajnime më të plota në tema më specifike.

Ditët e sotme globalizimi është një temë shumë tërheqëse për të gjithë, por pyetja që ne shtrojmë është, a mund të ndihmojë lokalizimi në procesin e globalizimit? Pra, fakti se ekzistojnë shkrime, video apo të dhëna në gjuhë të ndryshme lokale, kjo a nuk ndihmon në procesin e globalizmit? Ne mendojmë se po, pasi nëpërmjet “Mëso Falas” synojmë të arrijmë audiencë të gjerë në të gjitha trojet shqiptare dhe për këdo person shqipfolës në botë. Iniciativa që forcojnë lokalitetet janë patjetër në dobi të së mirës së përgjithshme në nivel global. Që kjo gjë të bëhet e mundur nevojitet nga ana jonë qëndrueshmëri e vazhdueshme dhe krijimi i një linje më të gjerë trajnimesh edukuese profesionale dhe interaktive.

Must watch
Business Mag Nr. #23 - Qershor 2020

Të gjitha planet tuaja për këtë vit, si individë apo sipërmarrës mund të jenë përmbysur. Mbërritja e Coronavirusit në Shqipëri paralizoi gjithçka, ashtu si kudo. Në mënyrë të papritur na vuri në kushte tërësisht të tjera pune, na shtoi pasigurinë e shqetësimin për të ardhmen.

Sipërmarrjet, kryesisht në fushën e IT u përshtatën më shpejt, duke angazhuar punonjësit nga shtëpia. Ato zhvilluan dhe më tej mundësitë për të punuar në distancë, ndërkohë që shumë kompani të tjera u mbyllën plotësisht.

Kjo është një periudhë sprove, për individin, drejtuesit dhe liderin. Kjo është lufta që po zhvillohet në spitale dhe fronti i parë i saj janë mjekë, infermierë e sanitarë. Historia e ekonomisë k a treguar se gjithmonë pas një situatë të vështirë ka një ringritje. Dhe ne besojmë se kështu do të jetë.

Deri atëhërë ajo çka na mbetet të bëjmë është respektimi i rregullave të kërkuara, marrja e përgjegjësive ndaj të tretëve për aq sa mundemi, e të interesohemi për të pamundurit, të ndajmë diçka për ta.

Solidariteti nuk ka munguar e nuk do të na mungojë as kësaj radhe. Ajo çfarë doli në pah krahas solidaritetit ishte varfëria: e shtetit, e kompanive dhe e vetë individëve.

Një ditë pas dërgimit të 30 bluzave të bardha në Itali, The Guardian na vlerësoi në artikullin e saj si zemërgjerë edhe pse Ky numër ishte planifikuar të botohej në Prill 2020, por procesi u shty për shkak të masave të ndërmarra si pasojë e shpërthimit të Covid-19. Edhe pse në kohë vështirësish, jemi …

Shiko më shumë
Na ndiqni në rrjetet sociale