Nëse do të ngrini sytë drejt qiellit sot në mbrëmje, do të vini re diçka të pazakontë: Hëna do të shkëlqejë më fort, do të duket më e madhe dhe do të ndjehet më pranë Tokës se zakonisht.
Kjo ndodh sepse po afrohet superhëna e nëntorit, e njohur ndryshe si “Hëna e Kastorit” (Beaver Moon), e cila do të jetë superhëna më e afërt e vitit 2025.
Sipas NASA-s, ky fenomen ndodh kur Hëna e plotë përkon me pikën më të afërt të orbitës së saj rreth Tokës. Për shkak se orbita e Hënës nuk është rrethore, por paksa eliptike, ndonjëherë ajo afrohet më shumë, e ndonjëherë largohet më shumë nga planeti ynë. Kur këto dy momente, Hëna e plotë dhe perige përkojnë, krijohet superhëna.
Ky fenomen e bën Hënën të duket deri në 14% më e madhe dhe 30% më e ndritshme se një Hënë e plotë e zakonshme, sipas të dhënave nga NASA. Termi “superhënë” u përdor për herë të parë në vitin 1979 nga astrologu Richard Nolle.
Superhëna e nëntorit do të arrijë pikën e saj më të plotë të mërkurën, më 5 nëntor, në orën 14:20 sipas orës së Evropës Qendrore (CET). Ajo do të jetë e dukshme edhe një natë përpara dhe një natë pas, por momenti më i mirë për ta parë është menjëherë pas perëndimit të diellit të së mërkurës.
Lexo edhe: A mund të bëni asgjë për 90 minuta? Në Korenë e Jugut, kjo është një garë!
Për ta parë, nuk nevojitet asnjë pajisje e veçantë, mjaftojnë qiell i pastër dhe pamje e hapur drejt horizontit. Megjithatë, ndryshimi në madhësi është i vështirë të dallohet me sy të lirë. “Diferenca bëhet më e qartë kur krahasohet me foto ose vëzhgime të tjera,” shpjegon Shannon Schmoll, drejtoreshë e Planetariumit Abrams në Universitetin Shtetëror të Miçiganit.
Sa për efektet në natyrë, astronomët theksojnë se superhëna mund të ndikojë pak në rritjen e baticave, për shkak të tërheqjes më të fortë gravitacionale. Por sipas Lawrence Wasserman nga Observatori Lowell, ky efekt është shumë i lehtë për t’u vënë re në shumicën e zonave bregdetare.
Nëse e humbisni këtë spektakël qiellor, do të keni edhe një mundësi tjetër: superhëna e fundit e vitit 2025 do të ngrihet edhe më 6 dhjetor.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
