Dita e dytë e Javës Globale të Sipërmarrjes në Shqipëri solli një panoramë të gjerë aktivitetesh që ndërthurën teknologjinë, edukimin, sigurinë kibernetike, financat e gjelbërta dhe rolin e universiteteve në zhvillimin e të rinjve. Dita nisi me një simulim praktik mbi sulmet kibernetike të koordinuara ndaj universiteteve, ku studentët patën mundësinë të përfshihen drejtpërdrejt në skenarë të krizave digjitale, duke mësuar të reagojnë në mënyrë të strukturuar dhe bashkëpunuese në rast kërcënimesh të sigurisë.
Në vijim, u zhvillua një diskutim i gjerë mbi inteligjencën artificiale, qytetet e zgjuara dhe mënyrën se si teknologjia, aftësitë digjitale dhe infrastruktura moderne po ndikojnë në transformimin e vendit. Ky aktivitet theksoi nevojën për një qasje njerëzore në epokën e automatizimit, duke vendosur në qendër edukimin dhe inovacionin e zgjuar.
Një tjetër moment i rëndësishëm ishte aktiviteti i organizuar nga Banka e Shqipërisë, i cili u fokusua te financat e gjelbërta, taksonomia kombëtare dhe edukimi financiar për të rinjtë. Pjesëmarrësit u njohën me proceset e hartimit të standardeve të reja dhe rolin e bankës qendrore, duke përjetuar gjithashtu një eksperiencë edukative në muzeun e institucionit. Paralelisht, në Piramidë u zhvillua një takim me politikëbërës, investitorë dhe themelues startup-esh, ku u trajtuan format e reja të kapitalit, nga crowdfunding te financat e zhvillimit, duke i dhënë vëmendje trendit në rritje të instrumenteve alternative të financimit.
Lexo edhe: Çelet Java Globale e Sipërmarrjes në Shqipëri
Roli i universiteteve si nxitës të sipërmarrjes u vendos në fokus gjatë një aktiviteti të dedikuar zhvillimit të kompetencave dhe kulturës së inovacionit tek të rinjtë, ndërsa një sesion i veçantë prezantoi projektin Sustain4Future, i cili synon përgatitjen e trajnerëve në fushën e sipërmarrjes së qëndrueshme dhe financave të gjelbërta.
Pasditja solli edhe dy aktivitete me orientim teknik dhe praktik: një workshop mbi aksesin në kapital për startup-et në fazat e hershme, ku themeluesit u pajisën me strategji konkrete për strukturuar financimin, si dhe një meetup mbi ndërtimin e sistemeve RAG me inteligjencë artificiale, i dizajnuar për një audiencë të avancuar teknike dhe biznesi. Paralelisht, u lançua platforma ndërkombëtare Match4Research, e cila synon të krijojë ura bashkëpunimi midis akademisë, industrisë dhe institucioneve në funksion të kërkimit të komercializuar dhe qasjes në grante.
Në mënyrë të vazhdueshme gjatë ditës, në Universitetin Epoka vijoi ekspozita dhe gara e dedikuar startupeve të gjelbërta, duke sjellë në vëmendje idetë e studentëve që synojnë të kontribuojnë në një ekonomi më të qëndrueshme.
Në tërësi, dita e dytë e GEW Shqipëri 2025 u karakterizua nga ndërthurja e sigurisë kibernetike me inteligjencën artificiale, fokusi te financat e qëndrueshme dhe përfshirja aktive e universiteteve, duke e kthyer këtë ditë në një hapësirë praktike dhe strategjike për të gjithë aktorët e ekosistemit të inovacionit.
Agjendën me eventet për çdo ditë të javës e gjeni këtu
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto