Në librin e tij të vitit 1975, “The Philosophy of Andy Warhol (From A to B and Back Again)”, artisti i famshëm Andy Warhol shprehej: “Po të mund të punësoja dikë me pagesë të përhershme, do të merrja një shef. Mendoj se një shef do të ishte dikush i mirë për të pasur afër.” Mund të kuptohet lehtësisht kjo dëshirë. Kur je sipërmarrës, je vetë shefi yt dhe përcakton mënyrën se si kalon kohën. Por shpeshherë, dëshiron që dikush tjetër të të thotë çfarë të bësh.
E njëjta logjikë vlen edhe për LinkedIn. Mund të kalosh orë të tëra aty. Mund edhe ta injorosh plotësisht. Por nëse do të ekzistonte një plan i qartë që të ndihmon të ndërtosh audiencë dhe të gjenerosh klientë pa humbur kohë?
Nëse ke vendosmërinë, ky është plani i duhur. Profili im në LinkedIn është pranë shifrës prej 40,000 ndjekësish. Prej 18 muajsh e përdor platformën me qëllim të qartë dhe kam arritur rezultate të jashtëzakonshme me angazhim minimal. Shumica e strategjive në LinkedIn dështojnë sepse mungon plani. Problemi nuk është koha , por përqendrimi. Shumë sipërmarrës kalojnë nga një veprim te tjetri pa një drejtim të qartë: postojnë njoftime të mërzitshme të kompanisë që askush nuk i lexon, ose citate të vjedhura nga Instagrami. Kalojnë orë duke lëvizur feed-in, por nuk lidhen kurrë me klientë apo bashkëpunëtorë potencialë. Kjo është një strategji që nuk funksionon. Ja çfarë të bëni në vend të saj.
1. Komentim strategjik (10 minuta)
Nëse dëshironi rritje në LinkedIn, duhet të komentoni. Por nuk keni pse të kaloni orë të tëra. Zgjidhni 10 profile aktive që ndjekin një audiencë të ngjashme me atë që kërkoni ju. Ruajini profilet e tyre në një dosje shënimesh dhe vizitojini çdo ditë. Lini komente mendjemprehta në postimet e tyre më të fundit. Kjo teknikë rrit dukshmërinë tuaj dhe krijon marrëdhënie me persona me ndikim. Klientët e ardhshëm, kur shohin emrin tuaj duke kontribuar në biseda me vlerë, ju mbajnë mend kur u nevojitet shërbimi juaj.
2. Krijoni 5 postime në javë, publikoni 3 (10 minuta)
Bllokoni një kohë të caktuar çdo javë për të shkruar postime në LinkedIn. Synoni të krijoni 5 postime dhe publikoni 3 më të mirat. Fokusohuni në cilësi, jo sasi. Zgjidhni një temë për çdo seancë, suksese, mësime të nxjerra, apo gabime të rëndësishme. Përdorni AI për të zgjeruar idetë tuaja dhe planifikoni publikimet në orar të njëjtë çdo ditë (ose çdo disa ditë). Struktura e postimit ka rëndësi: një hyrje që ndalon lëvizjen, një mesazh i qartë dhe një pyetje në fund që nxit komente. Mos publikoni përditësime boshe, çdo postim duhet të zgjidhë një problem apo të gjenerojë emocion.
Lexo edhe:Reklamat sjellin gati trefish kthim nga investimi!
3. Përgjigjuni çdo ndërveprimi (5 minuta)
Rezervoni 5 minuta pasdite për t’u përgjigjur komenteve dhe mesazheve. Kur dikush komenton, ktheni përgjigje me mendim. Pyesni diçka shtesë, jepni më shumë informacion. Bëjini komentet të shndërrohen në biseda. Njerëzit që ndërveprojnë me postimet tuaja po tregojnë interes – përdoreni këtë si një mundësi për të hyrë në kontakt në mesazhe private.
4. Angazhohuni në mesazhe private (5 minuta)
Bisedat private janë qëllimi. Çdo ditë, rezervoni 5 minuta për t’iu përgjigjur mesazheve. Përdorni mjete si Kondo për efikasitet. Ndërtimi i marrëdhënieve ndodh në mënyrë më të thelluar përmes mesazheve. Bëhuni njerëzor, mos nisni menjëherë me ofertë për takim. Pyesni, dëgjoni, kuptoni botën e tyre. Qëllimi është të kuptoni nevojat e tyre, jo të bëni shitje të menjëhershme.
5. Ndiqni çfarë funksionon (5 minuta çdo javë)
Çdo javë, shpenzoni 5 minuta për të parë analizat e profilit dhe për të kuptuar se nga erdhën kontaktet më të vlefshme. Komentet sjellin vëmendje. Postimet ndërtojnë autoritet. Mesazhet private krijojnë marrëdhënie. Kjo është formula. Nëse veproni me qëllim, rezultatet nuk mungojnë.
Suksesi juaj në LinkedIn nuk ka pse të marrë orë të tëra. Mjafton një strategji e qartë: komentoni, publikoni me cilësi, përgjigjuni komenteve, dhe ndërtoni marrëdhënie përmes mesazheve. Përdorni aplikacionin mobil për ndërveprime të shpejta gjatë ditës, por ruani punët më të thella për kompjuterin. Rritja e audiencës dhe ardhja e klientëve të rinj janë çështje kohe – jo kohe të gjatë, por kohe të përdorur me mend.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
