Lajmi për krijimin e Super League të Evropës po shkakton një tërmet në botën e futbollit, me Uefa dhe Federatat në gjendje lufte pas vendimit të 12 klubeve për të filluar turneun e ri. Elita e futbollit është bërë bashkë për të kërkuar një mënyrë për të përmirësuar të ardhurat, duke i ofruar tifozëve futbollin e madh. Në këtë këndvështrim, duhet kuptuar si do të funksionojë ky format dhe cila do të jetë rregullorja e manifestimit kontrovers, data e fillimit e së cilës është ende e mbuluar me mister.
Skuadrat pjesëmarrëse
Aktualisht janë 12 skuadra që kanë aderuar: Milan, Arsenal, Atletico Madrid, Chelsea, Barcelona, Inter, Juventus, Liverpool, Manchester City, Manchester United, Real Madrid dhe Tottenham Hotspur si klube themeluese. Këtyre do t’u shtohen edhe tre të tjerë, gjithmonë si themelues, dhe 5 të kualifikuar në vit. Klubet që lindën formatin e ri nuk do të jenë kurrë në gjendje të zbresin.
Formati
Super League do të shohë në start 20 klube që konceptohen me 15 klube themeluese dhe 5 të kualifikuara në vit. Do të ketë dy grupe të përbërë nga 10 ekipe secila, të cilat do të luajnë si brenda ashtu edhe jashtë. Pas fazës së grupeve, 8 skuadra do të kualifikohen për një turne me eliminim direkt, duke luajtur vajtje e ardhje deri në finalen me ndeshje teke të Superligës, në një finale të sezonit prej katër javësh. Tre të parët në secilin grup do të kualifikohen automatikisht në çerekfinale. Të katërtat e të pestat do të përballen me njëri-tjetrin në një ndeshje vajtje-ardhje për dy vendet e mbetura në dispozicion për çerekfinalet. Finalja do të luhet në fund të majit në një stadium neutral.
Financimi nga JP Morgan
Është gjithçka çështje parash, shumë parash! Super Liga do të financohet nga “JP Morgan”, kolosi amerikan. “Reuters” shkruan se një zëdhënës i grupit me seli në Nju Jork e ka konfirmuar këtë me një e-mail. Shifra të larta, siç lexohet në komunikatën zyrtare të Super Ligës:
“Turneu i ri vjetor do të sjellë një rritje ekonomike shumë më të lartë dhe do të jetë një mbështetje për futbollin europian nëpërmjet një impenjimi për një kohë të gjatë, do të arkëtohen kontribute solidariteti pa një limit maksimal, që do të rriten në raport me përfitimet e ligës. Këto kontribute solidariteti do të jenë shumë të larta se ato që gjenerohen nga kompeticioni aktual europian dhe parashikohet që të kalojnë 10 miliardë euro gjatë periudhës fillestare të impenjimit të klubeve.
Përveç të tjerash, turneu do të ndërtohet mbi një bazë financiare të shëndoshë, me të gjithë klubet themelues. Në shkëmbim të impenjimit të tyre, klubet themeluese do të përfitojnë rreth 3.5 miliardë euro si mbështetje të planeve të tyre për investimin në infrastrukturë dhe për të rregulluar bilancet pas pandemisë së Covid-19.
Në lidhje me temën e solidaritetit, nga brenda botës së Super League theksohet se turneu i ri “do të sigurojë rritje ekonomike më të lartë dhe mbështetje për futbollin evropian përmes një angazhimi afatgjatë për të paguar kontribute solidariteti pa një tavan”. Një mbështetje prej 434 milionë euro në vit për 23 vitet e ardhshme, 160 më shumë se solidariteti aktual i Uefa. Destinacioni, rinia, futbolli bazë dhe futbolli i grave”.
Kur luhet
Turneu do të fillojë në gusht, por, duke pasur parasysh betejën ligjore të premtuar nga Uefa dhe federatat kombëtare, nuk është ende e qartë se në cilin vit. Nuk ka gjasa që të fillohet para sezonit 2022-2023. Ndeshjet do të luhen në mes të javës dhe të gjitha klubet do të vazhdojnë të luajnë në ligat e tyre kombëtare.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
