Shqipëria në sytë e Marie-Laure Hauters- Energji, sfida dhe mundësi të jashtëzakonshme për inovacion!

Nga Fatima Gorezi – Çfarë e bën Shqipërinë kaq të veçantë në sytë e të huajve? Për disa është natyra, për disa të tjerë mikpritja, kurse për një mentore ndërkombëtare të startup-eve si Marie-Laure Hauters, është kombinimi unik i qëndrueshmërisë, talentit dhe ambicies që i dallon shqiptarët. Në një rrëfim të sinqertë, ajo tregon për përvojën e saj në vendin tonë: nga emocionet e para kur mbërriti me pritshmëri modeste , deri te surprizat e bukura që i solli ballafaqimi me njerëzit, kultura dhe energjia e sipërmarrësve shqiptarë. Intervista sjell reflektime mbi forcën dhe dobësitë e ekosistemit të inovacionit, këshilla për themeluesit e rinj, gabimet që shpesh përsëriten dhe tregon se pse gratë sipërmarrëse janë një shtysë e domosdoshme për ndryshim.

Ju flisni me tone pozitive dhe shumë entuziaste për Shqipërinë, çfarë ju ka bërë më shumë përshtypje për vendin, njerëzit dhe kulturën tonë?

Për të thënë të vërtetën, para se të vizitoja për herë të parë Shqipërinë majin e kaluar, nuk e dija çfarë të prisja. Kisha shumë ide, paragjykime në mendje ( në më të shumtën të këqija)… dhe shumë shpejt kuptova se nuk kisha qenë kurrë më shumë gabim.

Ajo që më bëri më shumë përshtypje këtu është kombinimi i qëndrueshmërisë dhe të qenit i hapur. I shoh shqiptarët kureshtarë, ambiciozë, bujarë, të zotë dhe punëtorë. Që ditën e parë, gjithashtu vura re një ndjenjë të fortë mikpritjeje dhe mirënjohjeje, gjë që e bën bashkëpunimin jo vetëm të lehtë dhe të sinqertë, por edhe të këndshëm dhe shpërblyes. Për më tepër, nuk takova vetëm sipërmarrës në akseleratorin e startup-eve ku po mentoroja, por anembanë vendit, në forma të ndryshme. Të gjithë ndanin të njëjtat tipare: njerëz të etur për të ndërtuar ura dhe që vlerësojnë thellësisht marrëdhëniet; më pëlqeu shumë ajo përzierje ngrohtësie dhe vendosmërie.

Sa i përket vetë vendit, Shqipëria është afërsisht sa Belgjika, prej nga vij unë dhe më ka habitur pasuria e peizazheve dhe larmishmëria e aktiviteteve që ofron. Deri tani, kam kaluar rreth 6 javë në Shqipëri dhe kam pasur mundësi të eksploroj zona të ndryshme të vendit… dhe vazhdoj të rikthehem për të parë më tepër.  Nga ecjet në Alpet Shqiptare, te lundrimi nëpër liqene mahnitëse, zhytja në lumenj malorë të akullt, eksplorimi i qyteteve të trashëgimisë së UNESCO-s si Berati e Gjirokastra, vizitimi i plazheve me rërë të veriut pasi u dashurova me bregdetin shkëmbor të jugut… Sigurisht, asnjë vend nuk është i përsosur, por çdo udhëtim ka qenë vërtet i veçantë, dhe ende nuk jam ndalur. (Buzëqesh)