Shërbimi postar i Danimarkës do të shpërndajë letrën e fundit më 30 dhjetor, duke i dhënë fund një tradite mbi 400-vjeçare në dërgimin e postës fizike.
Vendimi u njoftua më herët këtë vit nga PostNord, kompania e krijuar në vitin 2009 pas bashkimit të shërbimeve postare të Suedisë dhe Danimarkës. PostNord bëri të ditur se do të shkurtojë rreth 1,500 vende pune në Danimarkë dhe do të heqë 1,500 kuti postare të kuqe, për shkak të “digjitalizimit në rritje” të shoqërisë daneze.
Duke e përshkruar Danimarkën si “një nga vendet më të digjitalizuara në botë”, kompania theksoi se kërkesa për letra ka rënë ndjeshëm, ndërsa blerjet online janë në rritje të vazhdueshme. Kjo ka shtyrë PostNord të fokusohet kryesisht në shpërndarjen e pakove. Simbolika e këtij ndryshimi u reflektua edhe në interesin e madh për kutitë postare tradicionale. Brenda vetëm tre orësh, 1,000 kuti postare të çmontuara u shitën, me çmime nga 1,500 deri në 2,000 korona daneze, në varësi të gjendjes. Një tjetër grup prej 200 kutish pritet të dalë në ankand në muajin janar.
Edhe pse PostNord do të vazhdojë shpërndarjen e letrave në Suedi, në Danimarkë kjo detyrë do t’i kalojë kompanisë Dao, e cila tashmë operon në tregun danez. Nga 1 janari, Dao do të zgjerojë shërbimin e saj, duke kaluar nga rreth 30 milionë letra të dërguara në vitin 2025 në 80 milionë vitin pasardhës. Megjithatë, qytetarët do të duhet të dorëzojnë letrat në pikat e Dao ose të paguajnë ekstra për t’i marrë nga shtëpia, ndërsa pagesa e postës do të bëhet online ose përmes aplikacionit. Shërbimi postar danez ka qenë përgjegjës për shpërndarjen e letrave që prej vitit 1624. Në 25 vitet e fundit, dërgimi i letrave ka rënë me mbi 90%, një tregues i qartë i transformimit digjital të shoqërisë.
Megjithatë, disa të dhëna sugjerojnë një rikthim të interesit për shkrimin e letrave, veçanërisht te të rinjtë. Sipas studimeve të Dao, grupmosha 18–34 vjeç dërgon dy deri në tre herë më shumë letra sesa grupmoshat e tjera. Studiuesi i trendeve Mads Arlien-Søborg e lidh këtë prirje me nevojën e të rinjve për të gjetur një “kundërpeshë ndaj mbingopjes digjitale”, duke e kthyer shkrimin e letrave në një zgjedhje të vetëdijshme.
Sipas ligjit danez, mundësia për të dërguar letra duhet të ekzistojë. Kjo do të thotë se, nëse Dao do të ndalonte shpërndarjen e letrave, qeveria do të ishte e detyruar të caktonte një operator tjetër.
Një burim pranë Ministrisë së Transportit deklaroi se nga viti i ri nuk do të ketë “asnjë ndryshim praktik”, pasi qytetarët do të vazhdojnë të dërgojnë dhe marrin letra, thjesht përmes një kompanie tjetër. Sipas tij, rëndësia e këtij ndryshimi është kryesisht “sentimentale”. Megjithatë, të tjerë e shohin këtë si një fund të pakthyeshëm. Magnus Restofte, drejtor i muzeut të komunikimit Enigma në Kopenhagë, thekson se në rast se komunikimi digjital do të bëhej i pamundur, kthimi te posta fizike do të ishte shumë i vështirë. “Ne nuk mund të kthehemi më te ajo që ka qenë,” tha ai, duke nënvizuar nivelin e lartë të digjitalizimit të vendit.
Në kuadër të sistemit kombëtar të identitetit digjital MitID, i cili përdoret për shërbime si bankat online, nënshkrimi elektronik dhe rezervimet mjekësore, të gjitha komunikimet zyrtare dërgohen automatikisht përmes “postës digjitale”. Edhe pse ekziston mundësia për të zgjedhur postën fizike, vetëm 5% e danezëve kanë përfituar nga kjo, ndërsa 97% e popullsisë mbi 15 vjeç është e regjistruar në MitID.
Sipas Restofte, publiku danez ka qenë “mjaft pragmatik” ndaj këtij ndryshimi, pasi shumë pak njerëz marrin sot letra fizike. Disa të rinj, madje, nuk kanë dërguar kurrë një letër me postë. Paradoksalisht, kjo mungesë ka rritur vlerën simbolike të letrës fizike. “Kur merr një letër të shkruar me dorë, vlera e saj është jashtëzakonisht e lartë,” shprehet ai. “Tregon se dikush ka investuar kohë dhe para.”
Duke komentuar vendimin, zëvendësdrejtori ekzekutiv i PostNord Denmark, Kim Pedersen, tha se mbyllja e këtij kapitulli ishte e vështirë: “Kemi qenë shërbimi postar danez për 400 vjet. Por danezët janë bërë gjithnjë e më digjitalë dhe sot kanë mbetur shumë pak letra. Rënia është aq e madhe sa tregu i letrave nuk është më fitimprurës.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
