Intervistë Ekskluzive me Drejtorin Ekzekutiv të Volvo Albania z. Erlind Bejkollari
Pavarësisht trendit rritës, blerja e automjeteve të reja në vendin tonë mbetet ende shumë e vogël krahasuar me ato të përdorura (madje me përdorim mbi dhjetë vjeçar). Erlind Bejkollari, Drejtor Ekskluziv i Volvo, ka mbi 13 vite përvojë në industrinë e automobilave në vend. Ai tregon se, shitjet e automjeteve të reja janë mbi 10 herë më pak se ato të përdorura. “Shiten pak më shumë se 3000 makina të reja në vit, ndërsa shitjet e makinave të përdorura janë 35-40 mijë”, shprehet Bejkollari.
Sipas tij, heqja e kufizimit për tregtinë e automjeteve të reja ishte një hap prapa, duke i krijuar sërish hapësirë tregtisë së makina mbi dhjetë vite përdorim. Ai kujton se për këtë arsye, makinat janë ndotësi kryesor i mjedisit në vendin tonë. Sipas tij, mjetet që importohen duhet të kenë një kriter importimi, që është niveli i ndotjes dhe siguria.
Një formë tjetër e nxitjes së tregtisë së automjeteve të reja është mundësia për paketa stimuluese nga institucionet publike Kjo do të bënte të mundur tërheqjen e makinave të vjetra nga tregu për një shumë të caktuar dhe rritja e blerjeve të mjeteve të reja.
Sipas tij, Volvo ka gjetur shtëpinë e duhur në Shqipëri “Mektrin Motors”, e cila i jep çdo lloj brandi vendin e duhur.
“Ne kemi mundësuar standardet me të fundit. Stafi punon me profesionalizëm dhe pasion. Ne kujdesemi që klientët të jenë të kënaqur dhe i japim rëndësinë e duhur marketingut. Të ndalosh para për marketingun, është sikur të ndalosh orën për të kursyer kohën”, thotë Bejkollari. Sipas tij, Volvo ofron siguri, komoditet dhe stili unik suedez- nuk pozicionohet shumë lart në dukje, por ofron shumë më shumë.
Ju mund të mos e dini, por Volvo është brandi i risive. Në vitin 1959 ajo shpiku rripin e sigurimit me 3 pika dhe që prej asaj kohe numërohen të paktën 1 milion jetë të shpëtuara. Si një brand pro jetës, patentat e saj të sigurisë nuk i shiti por i dhuroi për të gjithë prodhuesit e automjeteve. Në vitin 1971 Volvo shpiku sediljen e fëmijëve. Ndërsa më vonë solli mbrojtjen anësore dhe tavanore dhe më vonë City Safety (që identifikon objektet jashtë). Mes risive është edhe limiti i shpejtësisë, i cili nuk kalon 180 km/orë.
Lexo: Volvo: Idetë që ndryshojnë botën janë shpesh më të dyshimtat
Nga ky vit, Volvo sjell në automjete kamera që detektojnë nivelin e alkoolit dhe nivelin e përgjumjes. Nësë detektohet përgjumje, apo aromë alkooli, automjeti të sygjeron ndalimin.
Pandemia solli efekte të dukshme edhe në sektorin e automobilave. Ndalim prodhimi e tregtie, ashtu si edhe shtyrje e projekteve të kompanive. Për Volvon në tregun, u shty futja e makinës Full Electric. Prodhimi ka filluar dhe modelet e para janë në tregjet europiane.
