A ishin Temu dhe Shein varësia jote, ndoshta dhe rrjeti i ri social ku kalon një pjesë të mirë të kohës? Epo, kam një lajm jo dhe aq të këndshëm për ty.
Platformat gjigante të tregtisë online Shein dhe Temu nisën zyrtarisht rritjen e çmimeve, si pasojë e tarifave të reja të vendosura nga ish-presidenti Donald Trump mbi importet kineze. Paralajmërimet për këtë lëvizje ishin dhënë prej ditësh, por tashmë efektet janë të dukshme në çdo shportë online të konsumatorëve amerikanë.
Tarifat e reja, që kapin një normë prej 145% mbi importet kineze, prekin gati çdo kategori mallrash, nga elektronika dhe automjetet, deri te veshjet dhe aksesorët. E-commerce ultra i lirë, një sektor ku spikasin Shein, Temu dhe AliExpress, rezulton ndër më të prekurit.
Lexo gjithashtu: Shqipëria humb terren në Rajon, produktet vendase po bëhen jokonkurruese
Çmimet po rriten, klientët po ikin
Një vëzhgim i çmimeve në Shein tregon se, edhe pse jo të gjitha produktet janë prekur në mënyrë uniforme, tendenca është e qartë, një palë pantallona për fëmijë që më 17 prill kushtonin 8.29 dollarë, sot kushtojnë 10.19 dollarë, një fustan për gra është rritur nga 22.39 në 27.51 dollarë, ndërsa një palë pantallona për gra ka kaluar nga 13.99 në 17.09 dollarë. Disa përdorues të Reddit raportojnë madje rritje drastike deri në dyfishim të çmimit në disa artikuj.
Në faqen e Shein, një njoftim qartëson se tarifat janë përfshirë në çmimet e shfaqura: “Tarifat janë të përfshira në çmimin që paguani. Ju nuk do të paguani asgjë shtesë në dorëzim”. Megjithatë, shqetësimi midis blerësve mbetet i lartë, sidomos me hyrjen në fuqi më 2 maj të një raundi të ri taksash për paketat nën vlerën 800 dollarë, që më parë hynin në SHBA pa taksa doganore.
AliExpress ka zgjedhur një qasje edhe më transparente, duke shfaqur në mënyrë të dukshme koston e tarifave nën çmimet e produkteve. Në shumë raste, tarifat janë më të larta sesa vetë vlera e produktit, për shembull, një palë atlete me çmim 160 dollarë kanë një tarifë shtesë prej 260.80 dollarësh.
Lexo gjithashtu: Papa Françesku dhe rruga drejt një ekonomie të drejtë
Ndërkohë, ndikimi i tarifave nuk ndalet vetëm te konsumatorët individualë. Bizneset e vogla, të cilat furnizoheshin me komponentë nga Kina për të ndërtuar produkte të tyre në SHBA, raportojnë mungesë të mallrave në platformat si AliExpress. Kjo ka shkaktuar një valë ankesash dhe madje veprime ligjore, një grup kompanish të lojërave paditën administratën Trump, duke e quajtur vendimin “të paligjshëm dhe antikushtetues”.
Ekonomistët prej kohësh paralajmërojnë se tarifat nuk i paguajnë vendet eksportuese, por në fund bien mbi supet e konsumatorëve. Kjo duket se po konkretizohet tani, me amerikanët që përballen me fatura gjithnjë e më të kripura për blerjet e tyre online.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
