Për herë të parë, një sipërmarrës shqiptar është përfshirë në listën e miliarderëve të revistës prestigjioze Forbes. Samir Mane, themeluesi dhe presidenti i BALFIN Group, renditet në vendin e 2356-të me një pasuri prej 1.4 miliardë dollarësh.
Lista e miliarderëve të Forbes 2025 përfshin 3028 emra nga e gjithë bota, të përditësuar sipas çmimeve të aksioneve dhe kurseve të këmbimit. Ky vlerësim e bën Manen të parin shqiptar që arrin këtë sukses në një skenë globale biznesi.
Lexo gjithashtu: Samir Mane, përdorimi i duhur i inteligjencës artificiale do të përcaktojë suksesin apo dështimin e një biznesi
Nga refugjat në Austri te lideri i biznesit në Ballkan
Samir Mane nuk e nisi rrugëtimin e tij në botën e biznesit nga një pozitë e privilegjuar. Ai u largua nga Shqipëria komuniste në vitin 1991, duke u zhvendosur në Austri si refugjat. Dy vjet më vonë, në 1993, nisi një biznes të vogël duke shitur pajisje elektroshtëpiake në vendlindje.
Në vitin 1998, Mane themeloi Neptun, një nga zinxhirët më të mëdhenj të dyqaneve elektronike në Shqipëri. Suksesi i këtij biznesi i hapi rrugën zgjerimit, duke e kthyer BALFIN në një nga grupet më të fuqishme të investimeve në Ballkan. Në 2005, ai u kthye në Shqipëri për të hapur qendrën e parë tregtare në vend, duke sjellë një koncept të ri të tregtisë me pakicë në rajon.
Lexo gjithashtu: Samir Mane inkurajon drejtuesit e së nesërmes
Perandoria e BALFIN, nga Ballkani në Amerikë
Sot, BALFIN Group ka një portofol të gjerë investimesh që përfshijnë:
-Qendra tregtare, dyqane elektronike dhe lodrash në Ballkan
-Sektorët e pasurive të paluajtshme në SHBA, Kanada dhe Austri
-Një bankë dhe projekte të luksit në Shqipëri
-Parqe logjistike dhe një universitet privat në Shqipëri
Ky rrugëtim nga një refugjat në një miliarder global e bën historinë e Samir Manes një nga më të veçantat në biznesin shqiptar dhe më gjerë. Përfshirja e tij në listën e Forbes është një dëshmi e ndikimit të tij në ekonominë rajonale dhe ndërkombëtare.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
