Rusia përsëriti të martën se do të pranojë vetëm në rubla pagesën për dërgesat e gazit në BE pasi ministrat e G7 e quajtën këtë marrëveshje “të papranueshme”.
“Askush nuk do të furnizohet me gaz falas. Kjo është thjesht e pamundur. Dhe mund të paguhet vetëm në rubla,” u tha gazetarëve zëdhënësi i Kremlinit Dmitry Peskov.
“Kompanitë duhet të kuptojnë mjedisin krejtësisht të ndryshuar që ka lindur në kushtet e luftës ekonomike të zhvilluar kundër Rusisë,” tha ai.
Vendet perëndimore janë bashkuar pë të vendosur sanksione të forta ndaj Moskës që kur ajo zhvendosi trupat në Ukrainë, me Shtetet e Bashkuara që ndaluan importin e naftës dhe gazit rus mes masave të tjera.
Megjithatë, Bashkimi Evropian, i cili mori rreth 40 për qind të furnizimeve të tij me gaz nga Rusia në vitin 2021, ka vazhduar të furnizohet nga Moska.
Duke folur në emër të ministrave të energjisë të G7, gjermani Robert Habeck tha të hënën se kërkesa e Rusisë ishte një “shkelje e njëanshme dhe e qartë e marrëveshjeve ekzistuese”.
Ai tha se pagesat në rubla ishin “të papranueshme” dhe u bëri thirrje kompanive të energjisë që të mos përmbushin kërkesën e Putinit.
Të enjten, qeveria ruse, banka e saj qendrore dhe gjiganti i energjisë Gazprom pritet t’i paraqesin Putinit një sistem që do të lejojë pagesën e gazit të kryhet në rubla.
“Nuk ka asgjë më të mirë se gazi rus, të gjitha opsionet e tjera janë më të këqija. Ky është realiteti,” tha Peskov.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
