Rubik Hub është renditur sërish mes akceleratorëve më të mirë të startup-eve në Europë, për të dytin vit radhazi. Renditja prestigjioze realizohet nga Financial Times në bashkëpunim me Statista dhe Sifted.
Ky vlerësim konfirmon ndikimin e vazhdueshëm që Rubik Hub ka në zhvillimin e startup-eve në nivel ndërkombëtar, duke dëshmuar pjekurinë e programeve të tij dhe forcën e rezultateve që ka arritur ndër vite. Renditja e Financial Times konsiderohet një nga benchmark-et më të rëndësishme ndërkombëtare për programet e akcelerimit. Ajo bazohet në kritere të rrepta si suksesi i startup-eve në portofol (përfshirë kapitalin e ngritur), cilësia e mentorimit, fuqia e rrjetit ndërkombëtar dhe vlerësimet cilësore nga vetë pjesëmarrësit në programe. Me një rezultat prej 79.32 pikësh, Rubik Hub renditet në vendin e 55-të në renditjen e përgjithshme që përfshin 180 akceleratorë nga e gjithë Europa. Veçanërisht i spikatur është pozicionimi në vendin e 13-të për rrjetëzim (networking), që tregon forcën e komunitetit dhe lidhjet cilësore që krijohen brenda ekosistemit të Rubik Hub. Renditja e plotë mund të gjendet në faqen zyrtare të Financial Times.
“Fakti që jemi vlerësuar sërish nga Financial Times tregon se ajo që po ndërtojmë është relevante dhe ka ndikim real në nivel europian. Ky rezultat pasqyron punën e përditshme të themeluesve që mbështesim, të mentorëve tanë dhe të gjithë ekipit. Suksesi ynë matet përmes suksesit të startup-eve, dhe ky sukses mund të ketë forma të ndryshme: nga gjetja e klientëve dhe sigurimi i investimeve, deri te dështimi i hershëm i një ideje për të mos humbur burime të panevojshme, sipas parimit ‘fail fast’. Themeluesit marrin përsipër rreziqe të mëdha dhe në kontekstin aktual ekonomik, kjo kërkon edhe më shumë guxim. Ne jemi këtu për t’i ndihmuar të minimizojnë rreziqet dhe për t’u treguar edhe ato gjëra që ndoshta nuk i shohin ende. Mbi të gjitha, Rubik Hub është komunitet, mbështetje dhe ndarje e sinqertë e eksperiencave reale”, u shpreh Vlad Gliga, CEO i Rubik Hub.
Lexo edhe: Adem Morina: Oferta e integruar turistike Shqipëri–Kosovë, një nevojë urgjente
Gjatë vitit të fundit, Rubik Hub ka pasur fokus zgjerimin ndërkombëtar, me synimin për të rritur shanset e themeluesve që të shkallëzojnë bizneset e tyre në tregje të reja. Programet e akcelerimit gjatë vitit të kaluar janë përqendruar kryesisht në tregjet e Mbretërisë së Bashkuar dhe Italisë. Në nëntor 2025, Rubik Hub lançoi një edicion të dedikuar të Rubik Garage, i fokusuar ekskluzivisht në fushën e healthtech, duke njohur ndikimin e drejtpërdrejtë që zgjidhjet në shëndetësi kanë në jetën e njerëzve.
“Programet tona kanë evoluar bashkë me çdo brez themeluesish, por edhe me ndryshimet e tregut. Disa vite më parë nuk do ta kishim imagjinuar një akcelerator të dedikuar vetëm për një vertikal të caktuar. Sot, kemi arritur të ndërtojmë me sukses një edicion të përqendruar ekskluzivisht në ekipet që zhvillojnë zgjidhje në fushën mjekësore,” shton Gliga.
Në fillim të marsit, Rubik Garage do të organizojë Demo Day-n. Ndërsa eventi hapës u mbajt në Bolonja, eventi përmbyllës do të zhvillohet në Milano, ku pritet të marrin pjesë investitorë, klientë potencialë dhe përfaqësues nga kompani globale dhe akademia. Ndërkohë, Rubik Hub është shpallur së fundmi “Hapësira më e mirë e coworking në Europën Lindore” nga Global Startup Awards. Hapësira e tij në Piatra Neamț, e vendosur pranë maleve, krijon një ambient që nxit kreativitetin dhe inovacionin. Mijëra persona kanë kaluar në këtë hub, përfshirë përfaqësues korporatash, investitorë, sipërmarrës dhe qindra studentë që duan të mësojnë se si ndërtohet një biznes.
Që nga viti 2017, Rubik Hub – pjesë e North-East RDA, ka mbështetur mbi 400 startup-e teknologjike në Europë, duke u ofruar akses në njohuri strategjike, mentorë të nivelit të lartë, investitorë relevantë dhe një komunitet prej mbi 300 ekspertësh nga Rumania dhe vende të tjera. Deri më sot, startup-et në portofolin e Rubik Hub kanë siguruar mbi 75 milionë euro investime.
Për më shumë informacion:
hello@rubikhub.ro
www.rubikhub.ro
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
