Rreth 26 kompani u renditën ndër të parat që nënshkruan ‘Kodin e Praktikës për Modelet e Përdorimit të Përgjithshëm të Inteligjencës Artificiale’ (GPAI), bëri të ditur Komisioni Evropian të premten në një deklaratë.
Kodi, i cili u publikua nga Komisioni në fillim të këtij muaji, përbën një grup rregullash vullnetare që prekin çështje si transparenca, të drejtat e autorit, si edhe siguria dhe mbrojtja, me qëllimin që të ndihmojë ofruesit e modeleve GPAI të përmbushin kërkesat e Aktit për Inteligjencën Artificiale (AI Act).
Ndër firmat nënshkruese përfshihen gjigantë të teknologjisë si Amazon, Google, Microsoft dhe IBM. Në listë janë gjithashtu ofrues të inteligjencës artificiale si OpenAI, kompania franceze Mistral AI dhe startup-i gjerman Aleph Alpha.
Meta, nga ana tjetër, kishte njoftuar më herët se nuk do ta nënshkruante Kodin, duke pohuar se ai kufizon inovacionin dhe se “Evropa po ecën në drejtimin e gabuar sa i takon AI-së”.
Lexo edhe: Si të kuptoni nëse një këngë është krijuar nga AI?
Megjithatë, Meta do të duhet gjithsesi të përmbushë detyrimet që rrjedhin nga Akti për AI, i cili hyn në fuqi më 2 gusht.
Ndërkohë, kompania xAI, zhvilluesi i Grok, chatbot-it të platformës X – ka nënshkruar vetëm Kapitullin për Sigurinë dhe Mbrojtjen të Kodit, çka do të thotë se ajo do të duhet të dëshmojë përmbushjen e kërkesave të tjera të Aktit përmes mekanizmave alternativë, sqaroi Komisioni.
Google deklaroi këtë javë se do ta nënshkruajë Kodin, por shprehu shqetësime për ndikimin që rregullat e BE-së mund të kenë mbi inovacionin.
“Edhe pse versioni përfundimtar i Kodit është më pranë mbështetjes së objektivave të Evropës për inovacion dhe zhvillim ekonomik […] ne mbetemi të shqetësuar se Akti për AI dhe Kodi mund të ngadalësojnë zhvillimin dhe zbatimin e AI-së në Evropë,” shkroi Kent Walker, president i çështjeve globale në kompaninë mëmë të Google, Alphabet, në një postim në blog të mërkurën.
Sipas Komisionit, ofruesit që tashmë kanë në treg një model GPAI duhej ta kishin nënshkruar Kodin përpara datës 1 gusht, ndërsa të tjerët mund të bashkohen më vonë.
Nga e shtuna, 27 vendet anëtare të BE-së pritet të kenë emëruar autoritete kombëtare mbikëqyrëse për të siguruar që kompanitë në territorin e tyre të zbatojnë Aktin për AI. Në rast shkeljesh, gjobat për mjetet GPAI mund të arrijnë deri në 15 milionë euro ose 3% të xhiros vjetore të kompanisë – cilado që të jetë më e lartë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
