Rritja reale e pagave në Europë pritet të jetë pak më e lartë në vitin 2026 krahasuar me 2025-ën. Por cilat rajone do të dalin mbi mesataren?
Sipas Bankës Qendrore Europiane (BQE), pagat reale në eurozonë janë rimëkëmbur ndjeshëm pas rënies së fortë të shkaktuar nga vala e inflacionit në vitin 2022. Pagat nominale po rriten më shpejt se çmimet, duke u dhënë familjeve europiane më shumë fuqi blerëse. Si rezultat, në fillim të vitit 2025, pagat reale në eurozonë janë afërsisht në nivelet e para shpërthimit inflacionist të fundit të vitit 2021.
Organizata ndërkombëtare si OECD ende nuk kanë publikuar raportet krahasuese të pagave për vitin 2025, të cilat priten në fillim të 2026-ës. Megjithatë, sondazhet e specializuara ofrojnë një panoramë të qartë të trendeve.
Sipas raportit Salary Trends 2025–26 të Employment Conditions Abroad (ECA), pagat reale janë rritur pothuajse në të gjitha vendet europiane gjatë vitit 2025, një prirje që pritet të vazhdojë edhe në 2026.
Kush fiton dhe kush humbet nga rritja e pagave
Deri në fund të vitit 2025, pagat reale do të rriten në 23 nga 25 vendet europiane të përfshira në sondazh. Rumania (–0.9%) dhe Ukraina (–3.2%) janë përjashtimet e vetme, ndërsa rritja në vendet e tjera varion nga 0.2% në Austri deri në 5.1% në Turqi.
Në Turqi, një rritje nominale e pagave prej 40%, e kombinuar me parashikimin e FMN-së për inflacion prej 34.9%, përkthehet në një rritje reale prej 5.1%. Kjo e bën Turqinë vendin me rritjen më të fortë reale të pagave, e ndjekur nga Bullgaria dhe Hungaria.
Lexo edhe: Editorial/ Koha për të NDËRTUAR… ekonomi të qëndrueshme dhe digjitale!
Ndër katër ekonomitë më të mëdha të Europës, të ashtuquajturat “Big Four”, Franca renditet e para për rritjen reale të pagave, e ndjekur nga Gjermania, Italia dhe më pas Mbretëria e Bashkuar.
Turqia, rritje e fortë në letër, por presion mbi fuqinë blerëse
Turqia pritet të kryesojë sërish edhe në vitin 2026, me një rritje reale të pagave prej 8.1%, më e lartë se në vitin 2025.
“Turqia dallohet nga vendet e tjera europiane për shkak të rritjeve shumë të larta të pagave dhe inflacionit,” shprehet Steven Kilfedder, drejtues i analizës së produkteve në ECA. “Megjithatë, qytetarët turq janë ende larg fuqisë blerëse që kishin dikur.”
Ai thekson se punonjësit në Turqi kanë përjetuar disa vite rënie të pagave reale, pasi inflacioni është rritur më shpejt se pagat. Goditja ishte veçanërisht e fortë në vitin 2022 dhe mbeti e ndjeshme edhe në 2024.
Europa Lindore pritet të tejkalojë Perëndimin
ECA parashikon një rritje mesatare reale të pagave prej 1.4% në 25 vende europiane për vitin 2025 dhe 1.7% për vitin 2026. Rumania pritet të shënojë sërish rënie (–0.7%), ndërsa të gjitha vendet e tjera do të kenë rritje pozitive.
Hungaria, Polonia, Çekia dhe Bullgaria priten të jenë ndër vendet me rritjen më të lartë.
“Ekonomitë e Europës Lindore, në përgjithësi, pritet të tejkalojnë edhe një herë homologët e tyre në Europën Perëndimore, falë rritjes më të shpejtë ekonomike dhe produktivitetit më të lartë,” thuhet në raport.
Pse ekonomitë e mëdha mbeten nën mesatare
Mbretëria e Bashkuar pritet të ketë rritjen më të ulët reale të pagave mes ekonomive të mëdha europiane, me 1.1%, megjithëse kjo përfaqëson një përmirësim krahasuar me vitin 2025.
Edhe Italia dhe Britania e Madhe mbeten disi pas Francës dhe Gjermanisë për rritjen reale të pagave në 2026, kryesisht për shkak të inflacionit më të lartë të parashikuar.
“Edhe pse Britania pritet të shënojë rritjet më të larta nominale të pagave, rreth 3.6%, një pjesë e mirë e këtyre përfitimeve do të gërryhet nga inflacioni,” shpjegon Kilfedder.
Përveç Greqisë (0.9%), të gjitha vendet e tjera pritet të kenë rritje reale mbi 1%.
Sipas raportit, ekonomitë e mëdha të Europës Perëndimore si Spanja dhe Holanda do të vazhdojnë të mbeten nën mesataren rajonale për shkak të produktivitetit të dobët, kufizimeve fiskale dhe hezitimit të punëdhënësve për angazhime afatgjata në rritjen e pagave.
Të dhënat bazohen në një sondazh me 200 kompani shumëkombëshe, i zhvilluar nga gushti në tetor 2025, i kombinuar me projeksionet e inflacionit të FMN-së nga raporti World Economic Outlook i tetorit 2025.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
