Një robot autonom i fuqizuar nga inteligjenca artificiale, i cili premton të kryejë pothuajse të gjitha punët e shtëpisë për 500 dollarë në muaj, është prezantuar së fundmi nga një kompani teknologjike në Kaliforni.
I quajtur Neo, roboti humanoid me gjatësi 1.68 metra dhe peshë 30 kilogramë pritet të lançohet në SHBA në fillim të vitit 2026 nga kompania me seli në Palo Alto, 1X Technologies.
Kush nuk ka ëndërruar ndonjëherë që dikush tjetër të merrej me ato detyrat e pafundme të përditshmërisë? Nga larja e rrobave dhe e enëve, te organizimi i vakteve me ato pak ushqime që kanë mbetur në frigorifer për të shmangur shpërdorimin – administrimi i jetës së përditshme mund të jetë lodhës. Këtu hyn në skenë Neo: një robot i qetë, i lehtë dhe humanoid, i krijuar për ta bërë jetën e përditshme pak më të thjeshtë. Abonimi mujor kushton 499 dollarë, ndërsa për ata që duan ta blejnë plotësisht, çmimi shkon në rreth 20,000 dollarë. Jo pak, por padyshim mbresëlënës.
Neo do të ofrohet në tre ngjyra, bezhë, gri dhe kafe e errët. Fillimisht do të jetë i disponueshëm vetëm në SHBA, ndërsa tregjet e tjera globale do të duhet të presin deri në vitin 2027. Për disa detyra, roboti mund të lihet të funksionojë plotësisht në mënyrë autonome. Edhe kur nuk jeni në shtëpi, përdoruesit mund ta monitorojnë përmes një aplikacioni në telefon. Megjithatë, për detyra më komplekse ose të reja, Neo mund të ketë nevojë për ndihmën e një eksperti të 1X, i cili e trajnon nga distanca. Falë kamerës së integruar në fytyrë, roboti “njeh” ambientin e shtëpisë dhe mëson si të përmbushë funksione të panjohura më parë. Në seksionin e pyetjeve të shpeshta, kompania paralajmëron përdoruesit që të jenë gjithmonë të vëmendshëm gjatë përdorimit të robotit, veçanërisht në prani të fëmijëve, personave vulnerabël ose kafshëve shtëpiake. Paraporositë u hapën të martën (28 tetor), ndërsa kompania publikoi edhe një video shpjeguese prej 9 minutash mbi funksionimin e Neo-s. Videoja ka grumbulluar mbi 18 milionë shikime në platformën X (ish-Twitter).
Siç pritej, reagimet në rrjete sociale nuk munguan. Shumë përdorues e krahasuan situatën me filmat distopikë me robotë që kemi parë ndër vite. “Mos vallë nuk e keni parë filmin I, Robot?” shkroi një përdorues, ndërsa një tjetër shtoi: “Është koha.” “Është ironike që po ecim pikërisht drejt realitetit të filmave si I, Robot,” komentoi një i tretë.
Filmi i vitit 2004 me protagonist Will Smith, i vendosur 10 vite në të ardhmen, trajton pikërisht rebelimin e robotëve ndaj njerëzimit, nën justifikimin e mbrojtjes së tyre. Të tjerë pyetën me ironi se në cilin episod të Black Mirror po jetojmë aktualisht. “Zgjedhje e zgjuar ta bëjnë më të vogël se njeriu mesatar. Më e lehtë për t’u kontrolluar kur të vendosin të na vrasin,” shkroi dikush tjetër me humor të zi.
Ndërkohë, disa reagime ishin më praktike: “A do t’ia kujtojë burrit tim detyrat e shtëpisë?” pyeti me shaka një përdoruese. Por jo të gjithë ishin të entuziazmuar. Disa shprehën shqetësim për faktin që operatorë njerëzorë mund të kenë akses nëpërmjet robotit brenda shtëpive private. Një gjë është e sigurt: Neo nuk ka lënë askënd indiferent dhe po hap një debat të madh mbi kufirin mes lehtësimit të jetës dhe frikës nga një e ardhme gjithnjë e më “robotike”.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
