Në një kohë kur ekranet dominojnë fëmijërinë moderne, një trend i ri po fiton terren, rikthimi i lodrave klasike përmes teknologjisë. Prindërit e sotëm kërkojnë mënyra për t’ua përcjellë fëmijëve të tyre magjinë e lojërave të dikurshme, duke shmangur mbipërdorimin e pajisjeve elektronike dhe duke promovuar kreativitetin. Por kjo nostalgji për lodrat e dikurshme përplaset me shqetësimet për mbiprodhimin dhe ndotjen nga plastika. A mund të ndihmojë teknologjia në këtë mes?
Një shembull inovativ vjen nga Sort A Brick, një kompani që përdor inteligjencën artificiale për të rikthyer në jetë këto lodra nostalgjike, si LEGO. Në vend që fëmijët dhe prindërit të blejnë sete të reja, kjo formë teknologjie ju jep mundësinë të ripërdorin dhe organizojnë pjesët që tashmë kanë, duke i rikthyer ato në sete të plota dhe të gatshme për lojë.
Teknologjia në shërbim të rikthimit të lodrave
Përmes një sistemi të avancuar të skanimit dhe identifikimit me AI, Sort A Brick analizoi koleksionet e blloqeve LEGO të klientëve, identifikoi pjesët ekzistuese dhe sugjeroi se cilat modele mund të rikthehen në jetë. Nëse mungojnë pjesë, kompania u ofron klientëve mundësinë për t’i blerë ato, duke krijuar kështu një përvojë të re dhe të personalizuar loje pa nevojën e blerjeve të reja të shumta.
“LEGO është bërë nga plastikë e qëndrueshme dhe mund të zgjasë për dekada,” thotë Ilya Malkin, bashkëthemelues dhe CEO i Sort A Brick. “Por shpesh, lodrat shpërbëhen, pjesët përzihen dhe humbin vlerën e tyre fillestare. Ne menduam: Pse të mos sjellim sërish magjinë e lojës, duke përdorur ato që fëmijët tashmë kanë?”
Më shumë sesa një trend, një filozofi e re e konsumit
Kjo qasje inovative nuk është thjesht një zgjidhje praktike, por edhe një reflektim i një ndryshimi më të madh kulturor. Në epokën e mbiprodhimit dhe ndotjes, gjithnjë e më shumë konsumatorë po zgjedhin riparimin dhe ripërdorimin mbi blerjen e re.
Përveç përfitimeve ekologjike, rikthimi i lodrave ka edhe një vlerë emocionale. Për shumë prindër, rikthimi i lodrave të fëmijërisë së tyre nuk është thjesht një zgjedhje praktike, por një mënyrë për të ruajtur kujtimet dhe për t’ua kaluar ato brezave të ardhshëm. “Ka diçka magjike në faktin që një fëmijë mund të luajë me të njëjtat lodra që dikur kanë qenë në duart e prindërve të tij,” shton Malkin.
Një model i ri për industrinë e lodrave?
Ndërkohë që gjigantët si Hasbro dhe Mattel po rilançojnë linja të lodrave klasike për të tërhequr nostalgjinë e prindërve, qasja e Sort A Brick dhe inovacioneve të ngjashme po ofrojnë një alternativë më të qëndrueshme: të ruash, të rikthesh dhe të ri-luash.
Nëse kjo filozofi do të transformojë industrinë e lodrave në tërësi, mbetet për t’u parë. Por një gjë është e qartë, nostalgjia dhe inovacioni teknologjik mund të bashkëjetojnë, duke krijuar një qasje të re që u shërben si fëmijëve, ashtu edhe planetit.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
