Revolucion në trajtimin e kancerit? Shkencëtarët arrijnë të “riprogramojnë” qelizat kancerogjene!

Një zbulim i ri nga Koreja e Jugut po sfidon mënyrën tradicionale të luftës kundër kancerit. Studiuesit kanë arritur të tregojnë se qelizat kancerogjene nuk duhet domosdoshmërisht të shkatërrohen, në disa raste, ato mund të rikthehen në gjendje normale.

Duke përdorur modele dixhitale të quajtura “binjakë digjitalë” të rrjeteve gjenetike, shkencëtarët simuluan sjelljen e qelizave të prekura nga kanceri dhe u fokusuan te identifikimi i pikave kyçe të kontrollit që ndikojnë në funksionimin e tyre. Ata zbuluan disa gjene të rëndësishme, të quajtura “ndërprerës master”, si MYB, HDAC2 dhe FOXA2, të cilat përcaktojnë nëse një qelizë e zorrës së trashë mbetet kancerogjene apo rikthehet në gjendje të shëndetshme.

Sipas ekipit kërkimor, manipulimi i saktë i këtyre gjeneve ndaloi rritjen e pakontrolluar të qelizave dhe bëri që ato të silleshin sërish si qeliza normale, pa pasur nevojë për eliminim përmes terapive agresive. Nëse kjo qasje konfirmohet në studime të mëtejshme klinike, trajtimi i kancerit mund të zhvendoset nga shkatërrimi i qelizave drejt riprogramimit të tyre – një ndryshim rrënjësor në mjekësi.

Ndërkohë, një tjetër studim i publikuar në revistën shkencore Nature Medicine sugjeron se edhe ora kur administrohet kimioterapia mund të ndikojë ndjeshëm në rezultatet e trajtimit. Hulumtimi, i realizuar me 210 pacientë me kancer të mushkërive në fazë të avancuar, zbuloi se pacientët që marrin trajtimin para orës 15:00 kanë rezultate dukshëm më të mira sesa ata që trajtohen më vonë gjatë ditës.

Shkencëtarët e lidhin këtë me ritmet cirkadiane, orën biologjike të trupit, e cila ndikon në funksionimin e sistemit imunitar dhe reagimin ndaj terapive kundër kancerit.

Këto dy zhvillime tregojnë se e ardhmja e trajtimit të kancerit mund të mos varet vetëm nga ilaçet e reja, por edhe nga kuptimi më i thellë i biologjisë së qelizave dhe i ritmit natyror të trupit njerëzor.