Prishtinë/Sarajevë – Këshilli i Bashkëpunimit Rajonal (RCC) shpalli me krenari fitueset e çmimit Sipërmarrëset e Vitit 2024 nga Ballkani Perëndimor në një ceremoni të mbajtur mbrëmë në Prishtinë, duke vlerësuar gjashtë gra të jashtëzakonshme që po formësojnë peizazhin e biznesit në rajon përmes inovacionit, qëndrueshmërisë dhe shpirtit sipërmarrës.
Aktiviteti u hap nga Sekretari i Përgjithshëm i RCC, Amer Kapetanovic, së bashku me Aivo Orav, Shef i Zyrës së BE-së dhe Përfaqësues i Posaçëm i Bashkimit Evropian, si dhe Atifete Jahjaga, themeluese dhe kryetare e Fondacionit Jahjaga dhe ish-presidente e Kosovës.
“Sonte festojmë gratë e jashtëzakonshme që jo vetëm po ndërtojnë biznese, por edhe po transformojnë shoqëritë tona. Suksesi i tyre çon në rritje ekonomike, inovacion dhe përparimin shoqëror në të gjithë Ballkanin Perëndimor. Por, ndërsa nderojmë arritjet e tyre, duhet të pranojmë edhe sfidat që mbeten – gratë ende përballen me boshllëqe të mëdha në lidership, financim dhe mundësi ekonomike. Prandaj, RCC mbetet e përkushtuar për të avokuar për politika që sigurojnë mbështetjen dhe burimet e merituara për sipërmarrëset,” tha Amer Kapetanovic, Sekretari i Përgjithshëm i RCC.
Njihuni me Sipërmarrëset e Vitit 2024 nga Ballkani Perëndimor
Të përzgjedhura nga mbi 200 nominime, gjashtë laureatet e këtij viti përfaqësojnë sipërmarrëset më frymëzuese të rajonit në fusha të ndryshme:
Sipërmarrësja Artistike – Edina Hadžić: Themeluese e Sugar on Top, një kompani mode dhe dizajni e përkushtuar ndaj parimeve të zero mbetjeve në industri, duke promovuar praktika të qëndrueshme dhe etike të prodhimit me ndikim minimal në mjedis.
Sipërmarrësja me Ndikim Social – Ardita Vokshi: Zhvilloi një biznes të suksesshëm pastiçerie duke përdorur përbërës vendorë dhe duke punësuar gra, duke u ofruar atyre pavarësi financiare dhe aftësi të reja.
Sipërmarrësja në Fushën e Teknologjisë së Informacionit dhe Komunikimit (ICT) – Vesna Kuzmanovic: Themeluese e Impala Research, një platformë e bazuar në inteligjencë artificiale që përdor analizën e ndjenjave, ndjekjen e syve dhe njohjen e emocioneve për të ndihmuar bizneset të kuptojnë sjelljen e konsumatorëve.
Sipërmarrësja në Turizëm – Anđela Đokić: Krijoi FitCamp Montenegro, një qendër pushimesh në natyrë që promovon turizmin e qëndrueshëm dhe mbështet rrjetet lokale të fuqizimit të grave.
Sipërmarrësja e Re – Katarina Ejdus: Themeluese e Women on the Way, një ndërmarrje sociale që fuqizon gratë refugjate përmes modës së qëndrueshme dhe dizajnit etik.
Sipërmarrësja e Gjelbër – Marjana Koçeku: Rikonstruktoi shtëpinë tradicionale Kulla të familjes së saj duke e kthyer në një destinacion të turizmit të qëndrueshëm, për t’i ofruar vizitorëve një përvojë autentike të Alpeve Shqiptare.
Kjo nismë, e financuar nga Bashkimi Evropian, u lançua si pjesë e Planit të Veprimit për Tregun e Përbashkët Rajonal dhe Agjendës së RCC për Fuqizimin Ekonomik të Grave, me synimin për të njohur dhe mbështetur gratë që udhëheqin, inovojnë dhe krijojnë vende pune të qëndrueshme në rajon.
Që nga fillimi i saj, 18 gra të jashtëzakonshme kanë marrë këtë titull prestigjioz, duke përfshirë fitueset e vitit të kaluar: Irena Chaushevska, Ilda Humic, Marija Ivanković Jurišić, Nikolina Kovačević, Rigerta Loku dhe Hana Qerimi.
“Gratë sipërmarrëse janë shtytësit kryesorë të stabilitetit, rritjes dhe inovacionit në Ballkanin Perëndimor. Bizneset e tyre jo vetëm që krijojnë vende pune, por gjithashtu adresojnë sfida shoqërore, promovojnë qëndrueshmërinë dhe riformësojnë lidershipin,” shtoi Kapetanovic.
Sfida dhe përparime
Megjithëse ka pasur përparime, hendeku gjinor vazhdon të jetë i pranishëm. Gratë në rajon ende fitojnë 16% më pak se burrat. Vetëm 1 në 7 menaxherë të nivelit të lartë është grua. Vetëm 1 në 3 vende në parlament mbahet nga një grua.
Ndërsa rajoni ecën përpara, RCC mbetet e përkushtuar për të nxitur sipërmarrjen dhe fuqizimin e grave përmes avokimit politik, nismave për përfshirje financiare dhe mundësive të rrjetëzimit rajonal, duke ndihmuar bizneset e udhëhequra nga gratë të integrohen në zinxhirët e vlerës rajonalë dhe të BE-së.
Më shumë informacion:
Rrjeti Rajonal i Grave në Sipërmarrje: Women Who Launch
Nisma & Laureatet e Sipërmarrëseve të Vitit nga Ballkani Perëndimor
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Albanian
English