Në prag të Maratonës së Tiranës, e cila mbahet nesër, sjellim një histori frymëzuese që bashkon suksesin profesional me filantropinë. Emanuela Sardi, shqiptaro-franceze me një karrierë të shkëlqyer në PwC Luksemburg, është shembulli i diasporës që nuk e harron vendin nga vjen. Falë angazhimit të saj personal, PwC Albania është shndërruar në donatorin më të madh vjetor të Down Syndrome Albania (DSA), duke dhuruar 40.000 euro vetëm për vitin 2025. Përmes punës së saj për Shqipërinë dhe Kosovën, Emanuela ka treguar se suksesi fiton vlerë të vërtetë vetëm kur kthehet në kontribut për shoqërinë.
Nesër, në Maratonën e Tiranës, bashkohuni me DSA dhe PwC Albania për të vrapuar për përfshirje, dashuri dhe ndryshim!
Ju keni një karrierë të shquar në PwC Luksemburg dhe menaxhoni portofolin për Shqipërinë dhe Kosovën. Çfarë ju frymëzoi të merrni këtë përgjegjësi dhe si e realizoni këtë rol nga Luksemburgu?
Edhe pse jam larguar nga Shqipëria para 25 vitesh, kam ruajtur gjithmonë një ndjenjë të fortë përgjegjësie për të kontribuar në zhvillimin e saj. Kur u krijua mundësia për të mbështetur Shqipërinë dhe Kosovën nga Luksemburgu, e pashë si një mënyrë ideale për të ndërthurur përvojën time profesionale me angazhimin personal. Sot, rreth 90 të rinj punojnë për PwC Luksemburg nga Tirana dhe kjo menaxhohet përmes bashkëpunimit të ngushtë me ekipet lokale nën drejtimin e Loreta Pecit. Përmes projekteve të përbashkëta, synojmë të japim një kontribut pozitiv jo vetëm duke krijuar vende pune dhe sjellë biznes, por edhe duke mbështetur komunitetin, përfshirë organizata si Down Syndrome Albania (DSA).
Ju jeni një donatore e rregullt për kauza sociale. Cili është motivi juaj?
Motivi im është i thjeshtë: besoj se secili prej nesh ka një detyrë për të dhënë diçka mbrapsht. Kam pasur fatin të ndërtoj një karrierë të suksesshme dhe dua që kjo të shërbejë si një mjet për të ndihmuar ata që kanë më pak mundësi. Mbështetja për organizata si DSA më ka treguar se si një kontribut modest mund të ndryshojë jetën e fëmijëve dhe familjeve në nevojë.
Lexo edhe: Erandi Sula: Suksesi pa qëllim është bosh. Solidariteti është kur nuk mbyll sytë!
Vetëm për vitin 2025, falë angazhimit tuaj PwC do të dhurojë 40.000 euro për DSA. Si e shihni impaktin e këtij kontributi dhe çfarë mesazhi keni për shqiptarët në diasporë?
Ky kontribut është një investim për të ardhmen e fëmijëve që mbështeten nga DSA. Organizata ofron terapi dhe shërbime jetike për fëmijë nga familje me të ardhura të ulëta dhe mbështetja jonë siguron vazhdimësinë e këtyre programeve. Mesazhi im për të rinjtë shqiptarë në diasporë është: kontribuoni, qoftë edhe pak, sepse çdo iniciativë, sado e vogël, ka vlerë të madhe për ata që janë në nevojë.
PwC Albania është sponsor i Maratonës së Tiranës me një kontribut prej 10.000 eurosh. Si mund të frymëzohet më shumë sektori privat për të kontribuar në komunitet?
Shembulli i PwC Albania në Maratonën e Tiranës tregon se sektori privat mund të jetë një motor i ndryshimit social. Për të frymëzuar më shumë biznese, duhet të tregojmë se kontributi në komunitet nuk është vetëm përgjegjësi sociale, por edhe një mundësi për të ndërtuar reputacion, për të angazhuar punonjësit dhe për të krijuar lidhje të forta me shoqërinë.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
