Kanë kaluar thuajse 9 vite që kur Porsche prezantoi për herë të parë një makinë me motorr me naftë. I pari, ishte modeli Cayenne, i pasuar me Panamera dhe Macan. Sot, në vitin 2018 duket se gjithë kësaj historie pritet t’i vijë fundi. Porsche ka vendosur ndalimin e ofrimit të motorrëve diesel, në një të ardhme të papërcaktuar.
Një zëvendës i Porsche shprehet për Autocar se e gjithë kjo ndodh për shkak të një “ndryshimi kulturor”. Modelet diesel, nuk janë pritur mirë dhe ka patur rënie të shitjeve për kompaninë në të gjithë botën. Cayenne Diesel, ndaloi së ekzistuari që prej vjeshtës 2017, e tashmë, është radha e Macan S Diesel dhe Panamera 4S Diesel.
Motorrët diesel të Porsche, janë ata 3.0 V6 të prodhuar nga Volkswagen Group dhe që gjejnë përdorim të gjerë brenda grupit. Por gjermanët nuk u treguan edhe aq “gjermanë” kësaj radhe. Disa Cayenne Diesel, u nisën aksidentalisht për në Amerikë përpara se t’i instalohej software i famshëm për “trukimin” e gazrave. Kësaj radhe, ata nuk mundën të mashtronin më pajisjet për testimin e gazrave dhe përputhjen me standardet e kërkuara.
Porsche, është kompania e parë gjermane, e cila del kaq hapur kundër modeleve diesel. Kjo, ndoshta lidhet pak edhe me statusin që kompania gëzon nga vitet e shkuara.
Në Korrik të vitit 2017, CEO i Porsche, Oliver Blume, u shpreh për Reuters se kompania mund të lërë motorrët diesel në favor të modeleve hibride ose 100% elektrike.
Kompania ka shpenzuar mbi 1 miliardë dollarë për përmirësimin e fabrikës së saj në Stutgard. Kjo për të realizuar planet për prezantimin e modelit Mission E me 4 dyer në vitin 2019. Ky model, do të jetë një rival i drejtpërdrejtë i Tesla. Anëtari i bordit të R&D pranë gjermanëve, Michael Steiner, u shpreh pak ditë më parë se makinat elektrike duhet të përbëjnë 25% të shitjeve vjetore të Porsche deri në vitin 2025. Modelet e ardhshme të Porsche, do të ndajnë një platformë elektrifikimi me “djalin e shtëpisë”, Audi.
Burimi: AutoBlog
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
