Tirana po shndërrohet në një qendër të re të inovacionit dhe sipërmarrjes në Ballkan. Plug and Play sjell për herë të parë në Shqipëri një program akseleratori që synon të zgjerojë potencialin global të startup-eve vendase.
Më 29 janar, në ambientet e Piramidës së Tiranës, u mbajt eventi zyrtar i lançimit të Plug and Play Tirana Accelerator Program, ku morën pjesë përfaqësues të Qeverisë së Shqipërisë, Bashkisë së Tiranës, Albanian-American Development Foundation (AADF) dhe IDEMIA Smart Identity (ISI). Hapja u shënua nga një fjalim përshëndetës i partnerëve kryesorë, ndërsa një nga momentet më të veçanta ishte rrëfimi inspirues i Dr. Philipp Gneiting nga Plug and Play mbi rrugëtimin e një startup-i drejt statusit të një “unicorn” global.
Pas prezantimit të detajuar të programit dhe sesionit të pyetjeve, Kryeministri Edi Rama mbajti fjalën përmbyllëse, duke theksuar rëndësinë e këtij akseleratori për ekosistemin e inovacionit në Shqipëri. Aktiviteti u mbyll me një sesion rrjetëzimi mes sipërmarrësve, investitorëve dhe profesionistëve të teknologjisë, duke krijuar një hapësirë të re bashkëpunimi dhe mundësish për startup-et shqiptare.
Programi i akseleratorit do të zhvillohet për pesë cikle gjatë tre viteve të ardhshme dhe do të përfshijë një program vjetor Global Overseas Acceleration & Learning (GOAL) në Silicon Valley, duke i ofruar startup-eve shqiptare akses në eksperiencën dhe rrjetin ndërkombëtar të Plug and Play.
Përmes këtij programi, startup-et shqiptare do të kenë mundësi të rriten, të tërheqin investime nga fondet e kapitalit sipërmarrës dhe të pilotojnë teknologjitë e tyre në tregjet ndërkombëtare.
Përveç trashëgimisë së saj historike dhe kulturës së gjallë, Tirana po konsolidohet si një qendër teknologjike në rajon, duke tërhequr një numër në rritje inovatorësh dhe investimesh në infrastrukturën digjitale. Krijimi i këtij programi akselerator është një hap tjetër drejt vendosjes së Shqipërisë në hartën globale të sipërmarrjes teknologjike.
Aplikimet për akseleratorin janë tashmë të hapura për të gjithë startup-et e interesuara për të shfrytëzuar këtë mundësi të jashtëzakonshme për të çuar idetë e tyre në një nivel tjetër.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
