Pinterest po i bashkohet nismës për të larguar të rinjtë nga telefonat gjatë orëve të mësimit. Platforma e njohur e rrjeteve sociale ka nisur testimin e një njoftimi pop-up për përdoruesit e mitur në SHBA dhe Kanada, i cili shfaqet gjatë orëve të shkollës dhe i inkurajon ata të mbyllin aplikacionin derisa të bjerë zilja.
“Nëse përqendrohesh, mund të arrish më shumë,” thuhet në njoftim, sipas raportimeve nga The Verge. “Qëndro në moment duke lënë Pinterest mënjanë dhe duke ndalur njoftimet derisa të përfundojë mësimi.”
Ky mesazh do t’u shfaqet vetëm përdoruesve të moshës 13 deri në 17 vjeç dhe vetëm gjatë orarit 08:00–15:00, nga e hëna në të premte. Pinterest ka njoftuar se testimi në shkallë të gjerë do të prekë “miliona” përdorues në këtë grupmoshë — dhe kompania pretendon se është e para ndër platformat teknologjike që teston një funksion “proaktiv” për të ndihmuar nxënësit të përqendrohen më mirë në shkollë.
“Në Pinterest besojmë se shkollat mund të përfitojnë nga teknologjia, ndërkohë që minimizojnë dëmet dhe shpërqendrimet që ajo mund të sjellë,” u shpreh Wanji Walcott, drejtuesja e çështjeve ligjore dhe të biznesit në Pinterest. “Kompanitë e teknologjisë duhet të bashkëpunojnë me mësuesit, prindërit dhe politikëbërësit për të ndërtuar zgjidhje që sigurojnë që në duart e nxënësve, telefonat të jenë mjete ndihmëse, jo shpërqendruese.”
Lexo edhe: Hollywood në epokën e robotëve, edhe filmat me AI mund të fitojnë Oscar!
Ndërkohë, shteti i Nju Jorkut është pranë miratimit të një ndalese totale të përdorimit të telefonave gjatë orëve të mësimit, një politikë që tashmë është zbatuar në shumë shtete të tjera. CEO i Pinterest, Bill Ready, ka shprehur më herët mbështetjen e tij për politika që nxisin shkollat pa telefona dhe për Aktin për Sigurinë e Fëmijëve Online.
Po ashtu, Pinterest ka njoftuar një grant prej 1 milion dollarësh për organizatën jofitimprurëse International Society for Technology in Education (ISTE), për të ndihmuar drejtuesit shkollorë në krijimin e një kulture të shëndetshme dixhitale në institucionet arsimore. Ky fond do të përdoret për krijimin e grupeve të posaçme pune në 12 distrikte shkollore në SHBA, me qëllim hartimin e politikave që përmirësojnë mirëqenien dixhitale të nxënësve.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
