Në Shkodër u prezantua ditën e djeshme studimi i fizibilitetit të hekurdhës Durrës-Prishtinë, e cila parashikohet të nisë nga Durrësi, të kalojë në Shkodër, për të vijuar në Gjakovë e më pas në Prishtinë. Ministri në detyrë i Infrastrukturës, Liburn Aliu ka thënë se është përmbyllur me sukses studimi i fizibilitetit dhe dizajni paraprak për linjën hekurudhore Durrës – Prishtinë. Aliu ka shkruar se nga Durrësi në Prishtinë: një hekurudhë e re, një epokë e re për Kosovën dhe Shqipërinë.
“Hekurudha Kuq e Zi. Përmbyllet me sukses studimi i fizibilitetit dhe dizajni preliminar për linjën hekurudhore Durrës – Prishtinë, një projekt strategjik që na afron më shumë me Shqipërinë dhe i hap rrugë një transformimi të madh ekonomik, social e mjedisor”.
Më tej, ai ka pohuar se “kjo linjë do të shërbejë si urë për njerëzit dhe bizneset, do të ulë kostot e transportit, dhe me portin e thatë në Prishtinë si zgjatje e portit Romano në Durrës, po krijojmë një nyje të re zhvillimi për të gjithë rajonin”. “Bashkë me zv. kryeministren e Shqipërisë Belinda Balluku, ministrin e Financave Petrit Malaj, kryetarin e Bashkisë së Shkodrës Benet Beci dhe kryetarin e Komunës së Gjakovës Ardian Gjini, pamë prezantimin e studimit të fizibilitetit dhe dizajnit preliminar për këtë linjë hekurudhore”. Mes tjerash, ai ka shtuar se 1.8 miliard euro investim, rreth 105 km hekurudhë, 14 tunele, 7 stacione, dhe një vizion i përbashkët i Shqiptarisë që po bëhet realitet.
Kurse, kryetari i Bashkisë së Shkodrës Benet Beci në fjalën e tij theksoi se “ky është një nga projektet më strategjike për Shkodrën dhe për lidhjen e saj të drejtpërdrejtë për Gjakovën dhe gjithë Kosovën. Një ëndërr shuëmdekadëshe që po bëhet realitet. Dua të falënderoj të dy qeveritë për vullnetin dhe vendosmërinë e treguar për ndërtimin e kësaj hekurudhe dhe vendimin që traseja të kalojë përmes Shkodrës në luginën e Kirit dhe më pas përgjatë Drinit për t’u lidhur me Tropojën, Gjakovën dhe gjithë Kosovën”.
Beci shtoi se ky është një nga vendimet më strategjike për Shkodrën që e vendos në kryqëzimin e dy linjave hekurudhore ndërkombëtare, drejt Malit të Zi dhe Kosovës, duke e lidhur me rrjetin evropian hekurudhor.
Gjatë ditës, kryeministri i Shqipërisë Edi Rama ka publikuar një video të projektit të hekurudhës Durrës-Prishtinë, ose hekurudha Kuq e Zi.Video tregon të gjithë rrugën që ndjek hekurudha dhe stacionet e parashikuara duke filluar nga Durrësi, Shkodra, kufiri Shqipëri Kosovë, stacioni i Gjakovës dhe më pas Prishtina.
Projekti paraqet gjithashtu detaje veprat e artit që parashikohen përgjatë hekurudhës, duke përfshirë këtu ura dhe tunele. Hekurudha midis Shqipërisë dhe Kosovës do të ketë shtatë stacione dhe një gjatësi prej 105.8 kilometrash. Kostoja e këtij segmenti përllogaritet në 1.8 miliardë euro.
Burimi: Monitor
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
