Një protestë unike në llojin e saj do të mbahet më 13 korrik në Shqipëri për herë të parë dhe iniciatorët e saj janë 200 zonja shtatzëna nga Mati, të cilat kërkojnë nga qeveria një mjek gjinekolog! Vetëm një së paku në spitalin e tyre!
Largimi nga vendi i mjekëve dhe paaftësia e Qeverisë për t’i mbajtur ata në vend, paaftësia për t’i joshur që të punojnë deri në zonat më të thella të vendit, ka bërë që zonjat e Matit ta ndiejnë shumë këtë problem që u rrezikon jetën.
Në një mesazh që njëra prej tyre i ka dërguar Dhurata Çupit, deputetes së PD, shkruan qartë për nevojën e madhe që po i shtyn në një protestë paqësore, nevojën për mjekun gjinekolog në kushtet kur as në Tiranë nuk i pranojnë për të lindur.
A do ta dëgjojë thirrjen e tyre Ministrja e Shëndetësisë Ogerta Manastirliu, përcjellë nëpërmjet znj. Çupi apo në të kundërt, mund të ndëshkohen me atë që ato kanë më frikë, heqjen e familjarëve të tyre nga punët shtetërore?!
“Zgjidhja duhet urgjente, – thekson deputetja Çupi. – Sa herë kam reaguar vetëm unë dhe askush nuk mban përgjegjësi dhe nuk merren masa për zgjidhje. Ku po shkojmë kështu?! Të tilla mesazhe më vijnë vazhdimisht. Si nënë, si grua, si deputete, i bashkohem kërkesës emergjente së këtyre nënave matiane.”
Në vijim, letra e grave shtatzënë që duan të protestojnë më 13 korrik:
Përshëndetje znj. Dhurata,
Rrethi i Matit u bë vite që vuan për një doktor gjinekolog të qëndrueshëm. Ishte një farë kohe dhe tani ka mbi 4 javë që përsëri spitali është pa doktor.
Unë personalisht jam shtatzënë në muajin e fundit dhe për punë ditësh do të sjell një fëmijë në jetë në Tiranë. Ama përveç meje ka me qindra gra të frustruara pasi na thanë që do të vinte doktori dhe tanimë na njoftuan që doktor nuk vjen.
Gratë shtatzëna në zona të thella janë vërtet në rrezik pasi as Tirana nuk i pranon pa qenë konsultuar më parë e kështu i dërgojnë në Lezhë apo Rrëshen në momente të fundit të lindjes.
Duam të organizojmë një protestë paqësore mirëpo nga frika se u hiqen njerëzit nga puna apo dhe arsye të tjera, nga afro 200 gra shtatzëna vetëm 5 jemi të gatshme të dalim në një protestë miqësore para spitalit për një të drejtë themelore. Protesta paqësore është nesër më datë 13.07.2021.
Do të ishte mirë nëse edhe ju do ta denonconit rastin ne fjalë, pra të mungesës së gjinekologut, ta paraqisnit si problem shqetësues. Unë ju kam shkruar të gjitha mediave dhe 2 prej tyre na kanë premtuar që të do jenë nesër pranë nesh për ta denoncuar.
Në pritje të përgjigjes suaj,
Faleminderit!
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
