Pas SPAR-it, Samir Mane shet edhe Fashion Group Albania

Pas shitjes së SPAR-it tek  Viva Fresh e Kosovës për 44 milionë euro, grupi Balfin ka shitur një tjetër nga kompanitë e tij. Këtë herë bëhet fjalë për Fashion Group Albania dhe sërish blerësi është një kompani nga Kosova. Autoriteti i Konkurrencës njoftoi se pranë tij është depozituar shkresa “Njoftim paraprak, me anë të së cilës është njoftuar lidhur me transaksionin e propozuar të përftimit të kontrollit të shoqërisë Fashion Group Albania SHPK nga shoqëria ALBI HOLDING SHPK.”Fashion Group Albania është një kompani specializuar në shitjen me pakicë të veshjeve dhe aksesorëve. Pjesë e grupit Balfin, kjo kompani mban ekskluzivitetin në Shqipëri për një numër markash ndërkombëtare të veshjeve si: Prenatal, Springfield, Geox, Aldo, Women’Secret, Okaidi, Mango, Parfois, Carpisa, Cortefiel.

Lexo edhe: Samir Mane, shqiptari i parë në listën e miliarderëve të Forbes

Çmimi i transaksionit nuk është bërë ende publik. Por të dhënat nga bilanci zyrtar i kompanisë tregojnë se vitin e kaluar Fashion Group Albania realizoi një qarkullim prej gati 11 milionë eurosh, ndërsa fitimi neto pas taksave, rezultoi 1 milionë euro.

Kompania ka një total asetesh prej 5.5 milionë eurosh dhe detyrime në masën 3.3 milionë euro. Diferenca, që përbën dhe kapiatalin e shoqërisë, në vitin fiskal 2024 ishte 2.2 milionë euro, ndërsa numri i të punësuarve ishte 154 vetë.

Blerësi Albi Holding është një shoqëri e themeluar në Shqipëri, e cila zotërohet nga 5 aksionerë të familjes Humolli nga Kosova. Kjo familje zotëron në Kosovë një nga grupet më të mëdha të biznesit, Albi Group, me interesa në turizëm, pasuri të paluajtshme, rrjete marketesh, dhe shitje me pakicë.

Shitja e dy kompanive brenda një kohë të shkurtër, SPAR dhe Fashion Group, sinjalizon se grupi Balfin po diveston nga Shqipëria, të paktën në segmentet jo bazë të biznesit. Vitet e fundit, ky grup ka reklamuar një sërë investimesh jashtë shtetit, veçanërisht në Austri dhe Shtetet e Bashkuara të Amerikës.

Kapitali