Nga Eni Muça– Gjetja e një vend parkimi është kthyer në stres të përditshëm për mijëra qytetarë. Pikërisht nga kjo nevojë lindi LookUp Parking, një startup shqiptar që po sjell një mënyrë më të zgjuar dhe moderne për të gjetur parkim, duke shndërruar hapësirat e pashfrytëzuara në një mundësi fitimi për pronarët dhe një lehtësi për shoferët.
Sot, LookUp nuk është thjesht një aplikacion, është një vizion i qartë për qytete më të zgjuara, më efikase dhe më të organizuara. Fitimi i çmimeve si NomadTech, pranimi në programet prestigjioze të akselerimit dhe rritja e shpejtë në tregun shqiptar, po e kthejnë këtë startup në një histori suksesi Made in Albania.
Për të mësuar më shumë për aplikacionin, por edhe si një prej fituesve të NomadTech, ne kemi zhvilluar njl intervistë me Xhurian Shabën, një prej themeluesve të aplikacionit.
Si lindi LookUp?
Histori interesante qëndron pas LookUp,një ide që lindi krejt natyrshëm, nga përvoja personale:
“Ideja për LookUp lindi nga përvoja personale e një prej bashkëthemeluesve gjatë përdorimit të Airbnb për të rezervuar një shtëpi pushimi,” shpjegon ekipi.
“Meqenëse shtëpia kishte një garazh të lirë në një zonë ku parkimi ishte problem, u mendua se kjo hapësirë mund të jepej me qira për periudhën e pushimeve, duke gjeneruar të ardhura. Ky koncept u zgjerua për të përfshirë të gjitha hapësirat e pashfrytëzuara që mund të shndërrohen në mundësi parkimi.”
Kjo ide e thjeshtë por gjeniale u kthye në një vizion biznesi: çdo hapësirë e pashfrytëzuar mund të bëhet parkim, dhe çdo pronar mund të përfitojë prej saj.
Si çdo startup që fut risinë në tregje tradicionale, LookUp hasur sfida të shumta.
1. Edukimi i tregut
Bindja e pronarëve të parkimeve dhe hapësirave komerciale se platforma është e sigurt, fitimprurëse dhe transparente, ishte sfida e parë dhe më e madhe.
“Po e zgjidhim çdo ditë duke ndërtuar besim, duke krijuar transparencë dhe duke subvencionuar kostot e integrimit,” tregon Shaba.
2. Integrimi me pushtetin lokal
Modernizimi i administratës mbetet sfidë shumëdimensionale, por LookUp po ndërton ura bashkëpunimi me bashkitë për të implementuar teknologji të menaxhimit të parkimit dhe trafikut.
Arritjet e deritanishme
Edhe pse startup i ri, LookUp ka shënuar arritje mbresëlënëse:
- 1,000+ shoferë aktivë
- 2,000 pika parkimi të identifikuara
- 20 ofrues aktivë privatë
- Njëri prej tyre ka gjeneruar 40,000 lekë në një muaj të vetëm
Këto rezultate tregojnë qartë nevojën reale të tregut dhe eficiencën e modelit të tyre. Pranimi në Fil Rouge Capital dhe fitorja e çmimit në NomadTech janë dy validime të forta që dëshmojnë vlerën dhe potencialin e LookUp në tregun rajonal.
Lexo edhe: Parkimi nuk do të jetë më një problem me LookUP Parking!
Rritja: Nga Tirana drejt Ballkanit, e më pas drejt Evropës
Plani i rritjes së LookUp është një kombinim ambicieje dhe strategjie të mirë strukturuar.
18 muajt e ardhshëm:
- Dominimi i tregut shqiptar
- Zgjerimi në qytetet kryesore të Ballkanit Perëndimor: Prishtinë dhe Shkup
3–5 vitet e ardhshme:
- Hyrja në tregje europiane me probleme të theksuara parkimi: Athinë, Bukuresht
- Shndërrimi i LookUp në sinonimin e parkimit të garantuar në Evropën Juglindore
Partneritete me bashkitë: Bazat e një “Smart City Foundation”
Partneritetet me bashkitë janë shtylla kryesore e modelit të LookUp.
Startup-i po punon për integrime në:
- sistemet e parkimit urban,
- menaxhimin e trafikut,
- kapacitetet “smart city”.
Për më tepër, LookUp i ofron bashkive shërbimet falas, si një mënyrë për të ndërtuar marrëdhënie të forta dhe për të sjellë vlerë të menjëhershme për qytetet.
Fitorja në NomadTech po i jep LookUp dy avantazhe strategjike:
1. Prodhimin në seri të pajisjes “Parking Blocker”
Optimizim, ulje kostosh dhe rritje të efikasitetit.
2. Një fushatë agresive Go-To-Market
Qëllimi: rekrutimi i valës së parë masive të ofruesve privatë para zgjerimit rajonal.
Vizioni: Eliminimi i frazës “nuk gjej parkim”
LookUp ka një vizion transformues: “Duam të eliminojmë frazën ‘nuk gjej parkim’. Duam të kujtohemi si kompania që demokratizoi parkimin urban, që shndërroi hapësirat e pashfrytëzuara në asete me vlerë dhe që u dha njerëzve gjënë më të çmuar — kohën e tyre.”
Në perspektivë afatgjatë, LookUp synon të bëhet një ekosistem i plotë rreth lëvizshmërisë së qytetarëve.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
