Ministri i Financave, Arben Ahmetaj, prezantoi sot vendimin më të ri të qeverisë, atë për paketën fiskale lehtësuese. Ahmetaj tha se falë ndryshimit në ligj, eksportuesit me një qarkullim mbi 50% përfitojnë rimbursimin e TVSH-së brenda 30 ditëve.
“Sot kaluam një vendim që ka lidhje të drejtpërdrejtë me paketën fiskale lehtësuese të procedurave që qeveria dhe kryeministri Rama ka avancuar në publik dhe në komunitetin e biznesit. Pr/vendimi në fjalë që sot është vendim ka të bëjë me TVSH-në në Shqipëri, ka ndryshuar në themel një nga procedurat që deri në sot mund të ketë qene penguese. Deri më sot rimbursim automatik brenda 30 ditëve do të merrte një biznes që ishte 100% sipërmarrje eksporti. Me ndryshimin që kemi bërë përfitojnë 50% e sipërmarrjeve në eksport duke hequr atë pengesë që ka ekzistuar deri më sot për rimbursimin e TVSH-së në eksport. Nëse deri më dje vetëm sipërmarrjet 100% eksportuese përfitonin rimbursim automatik dhe kur ishin nën kontroll tatimor, sot të gjitha sipërmarrjet që kanë një qarkullim në eksport 50% e sipër të qarkullimit të tyre total përfitojnë rimbursim automatik të TVSH-së së rimbursueshme pa asnjë pengesë, edhe kur janë në kontroll tatimor. Pra, brenda 30 ditëve do të marrin rimbursimin e TVSH-së edhe në rastin kur tatimet janë në sipërmarrje për kontroll”, tha ai.
Ahmetaj tha se ky vendim hap një kapitull të ri të klimës së përmirësuar të biznesit në vend.
“Mbyllëm procesin e konsultimit për procedurat tatimore dhe doganore. Jam i kënaqur që në mëse dy muaj mblodhëm propozime dhe shqetësime. Me këtë hap hapim kapitullin e klimës së përmirësuar të biznesit. Ekonomia po kalon në fazën e dytë të zhvillimit të saj”, tha Ahmetaj.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
